27e dimanche T.O.

DOMINIKA 27 NO TE TAU NOA

A taio tatou i te puta a Habakuka peropheta (1, 2-3 ; 2, 2-4)

Mai te aha te maoro, e te Fatu e, o to’u tiaororaa’tu ia oe, e aore â oe i faaroo mai ? O to’u piiraa ia oe ma te hamani ino hia, e aore oe i faaora mai ? E aha oe i faaite mai ai i te ino e te rohorohi ia hio au i te haru e te parautia ore i mua ia’u nei ? Ua rave hia te haavaraa, area ua puai o tei mâro mai ra. E ua pahono mai te Fatu ia’u, e ua parau mai : A papai i ta oe i ite, e a faaite i nia i te mau tabula, ia tere o te taio i te reira. No te mea ua huru atea tei faaite hia mai ; e tupu râ i te hopea, ma te mairi ore ; ia haamarirau rii oia, e tiai iana ; no te mea e haere mai oia, e ore e maoro e tae mai ai. Inaha, o te ore e faaroo, aore e tia tona varua i roto iana ; ua ora hoi te taata parautia i tona faaroo. » - O te Parau ïa a te Atua.

SALAMO 94 (95.),1-2,6-7ab, 7d-8a.9

A haere mai outou, a haamaitai tatou i te Fatu ma te oâoâ,
a himene hua tatou i te mato e ora’i tatou nei.
E haere tatou i mua i tona aro ma te haamaitai,
e ma te salamo e himene hua’tu ai iana.

A haere mai outou, e a haamori tatou, e tahopu ;
E tuu i to tatou turi i mua i te Fatu tei hamani mai ia tatou nei !
O oia hoi to tatou Atua,
o tatou hoi te taata o tana ra aua e te mau mamoe a tona ra rima.

I teie nei mahana, ia tia ia outou te faaroo i tona ra reo :
« Eiaha e faaetaeta i to outou na mafatu mai te i Meriba ra,
A faaooo mai ai to outou huimetua ia’u ra, e ua ââ mai ia’u,
i e noa’tu ratou i ta’u ra mau ohipa. »

A taio tatou i te epitore piti a Paulo peata ia Timoteo (1, 6-8.13-14)

E ta’u tamaiti here ra, ia faaara oe i te ō i tuuhia e te Atua i roto ia oe, na roto i te tuuraa o ta’u rima i nia ia oe na. E ere hoi i te Varua taiā te Atua i horoa mai no tatou, e Varua itoito rā ’e te aroha ’e te tinai nounou. No reira, eiaha oe e haama i te parau, ei ite no to tatou Fatu, ’e aiaha oe e haama ia’u, i tōna taata i tapeahia nei. E faarii rā oe i te mauiui no te Evanelia, mai ia’u atoa nei, ma te tiaturi i te mana o te Atua. A tapea maite i te mau parau maitatai ta oe i faaroo no roto mai i ta’u vaha ei hohoa na oe, ’e a parahi i roto i te faaroo ’e te here i te Kirito ra, ia Iesu. A tapea maite i te parau i tuuhia atu ia oe na, ma te tauturuhia e te Varua-Maitai o tei parahi i roto ia tatou.- O te Parau ïa a te Atua.

ALLÉLUIA (cf. 1 Pet 1, 25)

Te parau a te Fatu ra, e vai maite ïa e a muri noa atu. ’E taua parau nei, o te Evanelia ïa i a’ohia mai ia outou.

A taio tatou i te Evanelia a Luka peata (17, 5-10)

I taua anotau ra, ua parau maira te mau Apotoro i te Fatu : « A faarahi mai i to matou faaroo ! » Ua pahono maira te Fatu : « Ahiri e faaroo to outou, mai te hoe noa iho huero sinapi i te rahi, e parau noa atu ïa outou i teie tumu sukamino : “Ia mahiti tumu oe, ’e ia tanuhia i raro i te miti !”, ’e e faaroo mai oia ia outou. O vai to outou na, e tavini tōna te arote ra’e te tiai ra i te nana, e parau atu iana, ia hoi mai te mau aua : “A haere i nia i te amuraa māa tamāa ai” ? Eita anei oia e parau atu i taua tavini ra e : “A faaineine mai i tā’u māa ahiahi, a ahu ai i tō ahu taviniraa, a tuati mai ai ia’u, ia tamāa vau’e ia inu hoi, ’e ua paia anae vau, ei reira ïa oe e tamāa atoa ai ’e e inu ai.” ? E aau mehara anei to taua fatu ra i tōna tavini I te mea e, ua haapao oia i tei faauehia mai iana ra ? Oia atoa outou, ia oti i te ravehia te mau mea atoa i faauehia mai ia outou, e na ō ïa outou i te parau : “E mau tavini faufaa ore matou, ua rave noa hoi matou i tei au ia ravehia e matou, tirara.” » - Haapopou tatou i te Parau a te Atua.