28e dimanche T.O.

DOMINIKA 28 NO TE TAU NOA

A taio tatou i te puta maha no te mau Arii (5, 14-17)

I taua anotau ra, o Naamana, te raatira o te nuu o te arii o Suria, ua lepera hia râ oia, ua haere atura oia i raro, e tai hitu tona hopuraa i Ioridana, mai te au i te parau a te taata o te Atua ra, riro faahou atura tona tino mai te tino o te tamarii api, e ua mâ roa. Ua hoi maira oia iô te taata o te Atua ma te here atoa raa te feia i pee mai iana ra, tia atura oia i mua iana, naô atura : « Te ite papu nei au e, aita’tu e Atua è i te ao atoa nei, maori ra iô Iseraela nei anae ra. No reira, te ani nei au ia oe ia farii mai oe i te taoa haamaitairaa no ô mai i to tavini nei. » Ua pahono maira oia : « Te ora ra te Fatu, ta’u e tia nei i mua iana, e ore roa vau e farii noa’e ! » Atira noa’tu tona onoono puai raa’tu, aita roa râ oia i faatia noa’e. Ua parau atura Naamana : « Ia tia to oe hinaaro, teie râ, te ani nei au, a faatia mai oe ia’u i to tavini nei, ia afai au i te repo fenua mai te au i te teiaha e mae i na asini e piti ra ; eita hoi to tavini e rave faahou i te tutia taauahi, e te tahi tutia è atu i te mau atua èè, maori ra i te Fatu anae ra. » - O te Parau ïa a te Atua.

SALAMO 97 (98.), 1, 2-3ab, 3cd-4

A himene i te Fatu ra i te himene api,
e mau mea taa è hoi tana i rave,
na tona iho rima atau,
e tona rima moâ i faaora iana.

Ua faaite mai te Fatu i te ora nana,
ua heheu oia i tana parautia i mua i te aro o te mau etene ra,
tona aroha e tana parau tei manao
hia e ana i te utuafare o Iseraela ra.

Ua ite te mau hopea’toa o te fenua nei
i te ora a to tatou Atua.
Ia pinai te haamaitai i te Fatu e ati noa’e te fenua,
a himene e a oua i te oâoâ !

A taio tatou i te epitore piti a Paulo peata ia Timoteo (2, 8-13)

E ta’u tamaiti here ra, haamanao ia Iesu-Kirito, o tei faatia-faahou-hia mai roto mai i te pohe ra; no roto mai oia i te huaai o Davida, mai tei faaitehia i roto i te Evanelia tā’u e a’o nei. No taua Evanelia nei vau i roohia ai i te pohe e rave rahi e tae noa atu i te fifi auri nei, mai te hoe taata rave ohipa ino. Aita rā te parau a te Atua i ruuruuhia. No reira vau i faaoroma’i ai i te mau mea atoa nei no te feia maitihia ra, ia noaa atoa ia ratou te ora e vai ra i roto i te Kirito ra, ia Iesu ’e te hanahana mure ore atoa hoi. E parau teie e au ia tiaturihia : Ia pohe tatou ’e oia atoa ra, e ora ïa tatou ’e oia atoa hoi. Ia faaoroma’i tatou i te ino’e oia atoa ra, e hau ïa tatou’e oia atoa ra. Ia huna tatou iana, e huna atoa oia ia tatou. Ia riro tatou ei feia haapao ore, e tamau maite oia i te haapao i tāna parau : e ore hoi e ti’a iana ia faariro iana iho ei haavare. » - O te Parau ïa a te Atua.

ALLELUIA (1 Tes 5, 18)

E haamaitai i te Atua no te mau mea atoa ra. Te hinaaro nei hoi te Atua ia na reira outou i roto i te Kirito ia Iesu.

A taio tatou i te Evanelia a Luka peata (17, 11-19)

I taua anotau ra, i tōna haereraa i Ierusalema, ua na roto Iesu i Samaria ’e i Galilea. Tei te tomo raa atu oia i roto i te hoe oire iti, haere maira na lepera tino ahuru iana ra, ti’a noa ihora i te atea ’ē. Ua pii maira ratou, na ō maira : « E te orometua, e Iesu e, aroha mai ia matou. » I te hioraa oia ia ratou, ua parau atura Iesu : « A haere, a faaite ia outou i te mau tahu’a. » Te haere noa ra ratou, tamāhia ihora ratou. I tōna iteraa e, ua ora oia, ua hoi maira te hoe o ratou ma te pii hua te reo i te haamaitairaa i te Atua. Tipapa ihora oia i raro, i te pae avae o Iesu ma te haamaitai iana. E taata Samaria taua taata ra. Ua parau atura Iesu : « E ere anei tino ahuru atoa i tamāhia ? Tei hea iho nei e tooiva ? Aita hoe a’e o ratou i hoi mai e haamaitai i te Atua, o teie noa nei taata ’ē ! » Ua parau atura Iesu iana : « A ti’a i nia, a haere ; ua ora oe i to oe na faaroo.»                   - Haapopou tatou i te Parau a te Atua.