DOMINIKA 29 NO TE TAU NOA

A taio tatou i te puta Exodo (17, 8-13)

I te mau mahana ra, ua haere anae maira taua amuiraa’toa o te tamarii a Iseraela ra mai te medebara. Ua haere maira te Ati-Amaleka, e ua aro i te Ati-Iseraela i Raphidima. Ua parau aera Mose ia Iosua : « A maiti na oe i te taata, a haere, a aro i te Ati-Amaleka ; ia ananahi râ, e e i nia i te moua vau tia’i ma te raau a te Atua i ta’u rima. » Ua haapao ihora Iosua i ta Mose i parau ra, e ua aro atura i te Ati-Amaleka ; o Mose râ, e o Aarona, e o Hura, ua haere atura ïa i nia i te tupuai moua. E ua hopoi anae Mose i tana rima i nia ra, te upootia ra o Iseraela, e ua tuu anae oia i tana rima i raro, te upootia ra te Ati-Amaleka. E no te mea râ te teimaha ra te rima o Mose, ua rave ihora raua i te hoe ofai, tuu ihora i raro ae iana, e parahi ihora oia i nia iho, e na Aarona raua o Hura na rima a Mose i mau aera, hoe i te tahi pae, hoe hoi i te tahi pae ; aore aera tana rima i rohirohi e mairi noa’tu ra te mahana. Horo è atura Amaleka e tona mau taata i te ôê a Iosua. - O te Parau ïa a te Atua.

SALAMO 120,1-2, 3-4, 5-6, 7-8

Ua nânâ aera ta’u pue mata i nia i te mau aivi,
no hea mai o to’u tauturu ?
No ô mai i te Fatu ra te tauturu,
oia tei hamani i te rai e te fenua’toa nei.

Eiaha to tiai e turori noa i tona avae !
Eiaha oia e taoto noa ;
aita, aore roa te tiai no Iseraela e taoto,
e aore hoi oia e turuhe !

O te Fatu to tiai e to marumaru,
te i to rima atau te Fatu.
Eiaha oe ia tairi hia e te veavea o te mahana i te ao,
e i te marama o te rui.

Na te Fatu oe e tiai i te mau ino atoa ra,
nana e tiai i to oe na varua.
Nana oe e tiai i te revareva, e i to hoiraa mai,
mai tau mai e a muri noa’tu.

A taio tatou i te epitore piti a Paulo peata ia Timoteo (3, 14 – 4, 2)

E ta’u tamaiti here ra, o oe rā, e mau maite ïa i tei haapiihia ia oe ’e ta oe hoi i faarii, mai te parau papu ; ua ite hoi oe na vai te reira i haapii ia oe. Mai to oe api-roa-raa, ua ite oe i te parau mo’a i papaihia ra. E mana to te reira e noaa ai ia oe te paari, ’e e arataihia ai oe i te ora, na roto i te faaroo i te Kirito ra, ia Iesu. Te mau parau atoa i papaihia ra, e mea faaurua mai ïa e te Atua, ’e e mea maitai hoi no te haapii atu, no te patoi i te mau parau hape, no te faatitiaifaro, no te aratai i te parautia, ia faaineinehia te taata o te Atua, ’e ia haapii-maitai-hia, ia au maitai oia no te rave i te mau ohipa maitatai atoa ra. Te ani hua atu nei au ia oe, i mua i te aro o te Atua ’e o te Kirito ra, o Iesu, o te haere mai e haava i tei ora ’e tei pohe, no tōna fāraa mai ’e no tōna ra hau : e faaite hua oe i te Parau, e onoono, i te taime au ’e i te taime au ore, e faatitiaifaro i te hapa, e a’o atu, e faaitoito atu, ma te faaoroma’i rahi ’e te hinaaro i te haapii atu. - O te Parau ïa a te Atua.

ALLELUIA (cf. Heb 4, 12)

E mea ora hoi te parau a te Atua ’e te puai rahi. e ti’a i taua parau ra ia hiopoa i te mau manao ’e te mau feruriraa o te mafatu.

A taio tatou i te Evanelia a Luka peata (18, 1-8)

I taua anotau ra, ua parau atura Iesu i te hoe parabole ia ratou, ia pure ratou ma te tuutuu ore, eiaha ia fiu : Ua na ō atura : « E haava tei te hoe oire, aore oia i mata’u i te Atua, ’e aore oia e haapao i te taata. Tei roto atoa i taua oire ra te hoe vahine ’ivi ; e haere noa oia e parau i taua haava ra : “E faatia mai oe ia’u i ta’u enemi.” Aita a’era te haava i faatia vave i tāna aniraa ; ’e, muri a’era, ua feruri ihora oia : “Ore noa ai au i te mata’u i te Atua ’e i te haapao i te taata, no te mea rā ua taahoa vau i teie vahine ’ivi, e faatia atu ā vau i tāna aniraa, ’o te tamau noa oia i te haere mai, a ore roa atu ai to’u faaoroma’i.” » Ua parau atura te Fatu : « A faaroo mai na outou i te parau a teie haava parautia ore ! ’E eita anei te Atua e faatia mai i te feia tāna i maiti, o te tiaoro iana ra i te pō ’e te ao ? Haamaoro noa atu ā oia i te faatia i ta ratou pure ? Te faaite atu nei au ia outou : Oia ! Ia tae i te tau, e faatia mai oia ia ratou, e ore roa e māhia. Ia tae mai rā te Tamaiti a te taata, e itea anei iana te faaroo i te fenua nei ? » - Haapopou tatou i te Parau a te Atua.