2e dimanche de Carême

TE DOMINIKA 2 NO TE MAHA AHURURAA

A taio tatou i te puta Genese (15, 5-12.17-18)

I te mau mahana ra, te parauparau ra te Fatu ia Aberama i roto  i te orama : Aratai ihora oia iana i rapae, naô aera iana : « A nânâ i to mata i nia i te rai, a taio oe i te mau fetia, mai te mea ra e, e tia ia oe. » E ua naô â iana e : « Mai te reira’toa to oe na huaai ! » Faaroo atura Aberama i te Atua, e ua haapao hia te reira ei parautia nana ra. Ua parau maira iana e : « O vau te Fatu, o tei aratai mai ia oe mai Ura no Kaladaio mai, ia horoa’tu au i teie fenua na oe, e ia riro oe ei fatu no te reira. » Ua parau atura Aberama e : « E te Fatu, te Atua e, e aha te mea e ite ai au e e riro vau ei fatu no taua fenua ra ? » Ua pahono maira te Fatu i te naôraa e : « A puto mai i te hoe puaatoro ufa matahiti toru ra, e te hoe puaahiho ufa matahiti toru ra, e te hoe mamoe oni matahiti toru ra, e te hoe uupa e te tahi uuairao. » Rave ihora oia i taua mau mea’toa nei, vahi atura na ropu, e tuu i na pae e piti ra, e ua faito aera te tahi e te tahi ; area râ na mamu aore oia i vahi. Pou maira te mau manu taehae i nia iho i taua mau puaa ra, e ua tiahi è atura Aberama ia ratou. E i te mairiraa o te mahana, roohia ihora Aberama i te varea taoto, ati aera oia i te mataû rahi e te pouri taoto. E ia mairi aena te mahana, tupu atura te pouri taoto, itea hia maira te auauahi mai to te umu ra, e te tama ura, te i na ropu ïa taua na apapa puaa i te haere. I taua mahana ra, ua fafau te Fatu i te faufaa ia Aberama, i naô maira e : « E horoa’tu au i teienei fenua na to oe ra huaai e moti i te pape i Aiphiti e tae noa’tu i te pape rahi i Eupharate. » - O te Parau ïa a te Atua.

SALAMO 26, 1, 7-8a, 8b-9abc, 13-14

O te Fatu ta’u maramarama e ta’u ora,
o vai atura ïa tâ’u e matau atu ?
O te Fatu tô’u pare,
e riaria vau ia vai ra ?

A faaroo mai, e te Fatu e, teie hoi au te tiaororaa atu ia oe,
aroha mai, a pahono mai ai.
Te haamanao nei au i ta oe parau ra :
« A imi i tâ’u mata. »

O to oe hoi mata tâ’u e imi nei.
Eiaha maoti oe e fariu ‘è atu i to oe na mata.
Eiaha oe e faarue è atu i to tavini nei ma te riri ;
o oe hoi to’u tautururaa.

Te tiaturi nei au e, e farerei â vau i te hamani maitai o te Fatu
i nia i te fenua o te feia ora.
A tiaturi atu i te Fatu, ei aau etaeta to oe, e ia vai ito noa â,
a tiai atu i te Fatu ra.

A taio tatou i te epitore a Paulo peata i to Philippi (3, 17 – 4, 1)

E au mau taeae e, ei pee outou na ia’u, ’e ia tutonu no outou mata i te feia na reira i te haere, o vau nei hoi ta outou hioraa. Mai tā’u i parau pinepine ia outou, ’e mai tā’u hoi e parau faahou nei i teienei ma te roimata, e rave rahi te feia e au ta ratou haerea i to te enemi o te tatauro o te Kirito. O te pohe to ratou hopea ; to ratou atua, o to ratou ïa opu ; ’e ua riro to ratou mero haama ei teoteoraa na ratou. O te mau mea anae o teie nei ao ta ratou e haapao. Area tatou, to tatou oire, tei nia ïa i te ra’i, no reira e haere mai ai te Faaora ta tatou e tiai nei, to tatou Fatu ra o Iesu-Kirito. Nana e faahuru ’ē i to tatou tino haehaa nei, ma te faaau i tōna tino hanahana, na roto i tōna mana o te ti’a ia haavï i te mau mea toa. E au mau taeae here-rahi-hia, ua rahi tō’u hinaaro i te farerei faahou ia outou. O outou hoi tā’u oaoaraa ’e tō’u hei. ’E teienei, e au mau taeae, e na reira outou i te haapao tamau ma te turuhia e te Fatu. - O te Parau ïa a te Atua.

E aore ra, taioraa haapotohia :

A taio tatou i te epitore a Paulo peata i to Philippi (3, 20 – 4, 1)

E au mau taeae e, to tatou oire, tei nia ïa i te ra’i, no reira e haere mai ai te Faaora ta tatou e tiai nei, to tatou Fatu ra o Iesu-Kirito. Nana e faahuru ’ē i to tatou tino haehaa nei, ma te faaau i tōna tino hanahana, na roto i tōna mana o te ti’a ia haavï i te mau mea toa. E au mau taeae here-rahi-hia, ua rahi tō’u hinaaro i te farerei faahou ia outou. O outou hoi tā’u oaoaraa ’e tō’u hei. ’E teienei, e au mau taeae, e na reira outou i te haapao tamau ma te turuhia e te Fatu. - O te Parau ïa a te Atua.

IRAVA I MUA I TE EVANELIA (cf. Mat 17, 5)

Ei hanahana i te Kirito, te parau Etereno o te Atua ora. Ei hanahana ia oe, e te Fatu e.
Mai roto mai i te ata anaana ra, faaroohia ihora te reo o te Metua i te na’oraa e : “O ta’u Tamaiti here teie, a faaroo iana !”
Ei hanahana i te Kirito, te parau Etereno o te Atua ora. Ei hanahana ia oe, e te Fatu e.

A taio tatou i te Evanelia a Luka peata (9, 28b-36)

I teie tau ra, rave atura Iesu ia Petero ’e ia Ioane ’e ia Iakobo na muri iana, ’e ua haere atura i nia i te hoe mou’a e pure. Te pure ra oia, huru ’e atura te hïro’a o tana mata, teatea atura tōna ahu, ’e anaana roa atura. ’E inaha, paraparau maira e toopiti pu’e taata iana ra, o Mose ïa raua o Elia. Ua fā maira raua i roto i te hanahana, ’e te paraparau ra ratou no to Iesu revaraa, o te tupu i Ierusalema. Ua teimaha roa Petero mā i te taoto : ia ara a’era ratou, ite atura ratou i te hanahana o Iesu ’e na ’e na taata toopiti hoi i te paraparau-noa-raa iana. Tei te taa-‘ē-raa raua ia Iesu, ua parau atura Petero : « E te Fatu, e mea maitai ia parahi tatou i ō nei, e faatia matou i na fare autaa e toru a’e : no oe te tahi, no Mose te tahi, ’e no Elia te tahi. » Aita oia i ite i tāna e parau ra. Te paraparau noa ra Petero, o te ata maira i te tāmarura’a mai ia ratou. Roohia ihora ratou i te mata’u i te ōraa atu i roto i te ata. ’E e reo maira, no ō mai i te ata ra, i te na ōraa e : « O ta’u Tamaiti teie, o tā’u i maiti, a faaroo iana. » ’E, mure a’era taua reo ra, o Iesu anae ihora tei toe. Mamu ihora na pipi ra, ’e i te reira tau ra, aita ratou i faaite a’e i te mau mea ta ratou i ite. - Haapopou tatou i te Parau a te Atua.