TE DOMINIKA 2 NO TE TAU AVENETE

A taio tatou i te puta a Baruka peropheta (5, 1-9)

A tuu è atu i te ahu o to otoraa e to atiraa ra, e Ierusalema e : e a ahu na i te unauna, e te tura o taua hinihinu mure ore ra, tei roaa mai ia oe mai ô mai i te Atua ra. E faaahu mai te Atua ia oe i te ahu aroaro o te parautia ra, e e tuu oia i te hoe korona tura mure ore i nia iho i to upoo. E faaite hoi te Atua i tona anaana i roto ia oe, i te taata’toa i raro ae i te rai nei. E topa mai te Atua i te ioa ia oe na e a muri noa’tu : te Hau o te parautia e te Tura o te paieti ra. A tia i nia, e Ierusalema e, e a tia i te vahi teitei ra : a nânâ na i to mata i te hitia o te râ, e a hio i to mau tamari i te haaputuputuraa hia mai, mai te hitia mai o te râ e tae noa’tu i tona mairiraa, no te parau a tei Moâ ra, i te oâoâraa i te manaoraa i te Atua. A reva’i hoi ratou mai ô nei atu iô oe nei, ua haere noa ïa na raro, e ma te aratai hia e te enemi ; e faahoi mai râ te Fatu ia ratou ia oe na, e e faateitei hia i te tura mai te tamarii o te basileia ra. Ua haapao hia hoi e te Atua e ia faahaehaa hia te mau moua teitei atoa, e te mau papa mure ore ra, ia faaî hia te mau peho, e ia papu mai te fenua nei ia haere maite o Iseraela ma te faatura i te Atua. E no te faaueraa a te Atua, i tamaru mai ai te mau ururaau, e te mau raau haua noanoa’toa ra i nia iho ïa ia Iseraela nei. E aratai mai hoi te Atua ia Iseraela ma te oâoâ i te maramarama o tona ra hanahana, ma te aroha, e ma te parautia e na ô mai iana ra. - O te Parau ïa a te Atua.

SALAMO 125, 1-2ab, 2cd-3, 4-5ab, 6-7

I te faahoiraa te Fatu i te mau titi o Siona,
ua au ïa tatou i te feia i moemoea hia ;
i aera to tatou vaha i te ata iu reira,
e to tatou utu i te himene oâoâ.

E i  reira to te etene parau raa e :
« E ohipa faahiahia ta te Fatu i rave no ratou ! »
E ohipa faahiahia ta te Fatu i rave no tatou nei,
i oâoâ’i tatou.

A faahoi mai, e te Fatu, i to matou mau titi,
mai ta oe i faahoi i te vai pue i Negeba ra !
O tei ueue ma te roimata ra,
e ooti ïa ma te himene oâoâ.

Ua haere ratou, ua haere oia ma te oto,
ua ueue i te huero,
ua hoi mai ratou, e ua hoi mai ma te himene
e ua hopoi atoa mai i te mau ruru sitona.

A taio tatou i te epitore a Paulo peata i to Philipi (1, 4-6.8-11)

E te mau taeae e, ’e, i roto i tā’u atoa mau pure no outou atoa na, e pure au ma te oaoa. E haamanao hoi au i to outou tururaa i te Evanelia, mai te mahana matamua mai ā e tae roa a’enei i teienei. Te tiaturi nei au e, o tei haamata i roto ia outou i taua ohipa maitai na, nana ā ïa e rave tamau i taua ohipa na e tae roa atu i te mahana o Iesu-Kirito. O te Atua tō’u ite, te here rahi nei au ia outou i roto i te aau aroha o te Kirito ra o Iesu. Te pure nei au ia tupu to outou aroha, ’e ia rahi roa atu ā, ma te ite mau ’e te aapo, ia papu ia outou te mau mea i hau i te maitai, ’e ia riro outou ei feia parau mau ’e te hapa ore, no te mahana o te Fatu ra ’e ia ï outou i te hotu o te parautia e horohia mai e Iesu-Kirito, ei faahanahanaraa ’e ei haamaitairaa i te Atua. - O te Parau ïa a te Atua.

ALLELUIA (cf. Luk 3, 4.6)

A faaineine i te ea no te Fatu, afaaafaro i tona ra mau haerea : e ite te mau tino atoa i te ora a te Atua.

A taio tatou i te Evanelia a Luka peata (3, 1-6)

I te ahuru ma pae o te matahiti i te hau o Kaisara Tiberio, o Ponotio Pilato te tavana i Iudea, o Heroda te teterahera i Galilea, o tōna taeae, o Philipa, te teterareha i Iturea ’e i te fenua o Terahoniti, ’e o Lusania te teterareha i Abilene ; o Ana ’e o Kaiapha na tahu’a rarahi, ua tae maira te parau a te Atua ia Ioane, te tamaiti a Zakaria ra, i te medebara. Haere atura oia te mau vahi atoa i te pae o te pape ra o Ioridana, i te poro-haere-raa i te papetitoraa tatarahapa, no te matararaa o te hara, mai tei papaihia i roto i te puta o te mau parau a Isaia peropheta : E reo no te hoe i te tiaororaa i te medebara ra ; a faaineine i te ea o te Fatu, a faaafaro i tōna ra mau haerea ;e hope te mau peho i te faaïhia, e hope te mau mou’a ’e te mau aivi i te faahaehaahia ; te mau ea pi’o ra, e faatitiai farohia ïa, te mau aratia puupuu ra, e haamaninahia. E ite te mau tino atoa i te ora a te Atua. - Haapopou tatou i te Parau a te Atua.