30e dimanche T.O.

DOMINIKA 30 NO TE TAU NOA

A taio tatou i te puta a Etaretiatiko (35, 15b-17.20-22a)

O te Fatu ra hoi te haava, e e ore roa oia e haapao i te tura o te taata nei. E ore te Fatu e ite mai tana i tei hamani ino i te taata rii ra, e e faaroo mai oia i te pure a tei rave ino hia ra. E ore oia e vahavaha i te pure a te otare ra, e ta te vahine ivi, ia faaite hua’tu oia i tana ra parau oto. O tei haamori i te Atua ma te oâoâ ra, e ite hia mai ïa, e e tae tana pure i nia roa i te mau ata. E putaputa te mau ata i te pure a te taata e faahaehaa iana iho ra ; e e ore â oia e nâ e ia fatata roa mai iana : e e ore â oia e haere è, maori ra ia ite hua mai te Teitei roa. E ore hoi te Fatu e haamarirau, e faatia râ oia i te feia parautia. - O te Parau ïa a te Atua.

SALAMO 33,2-3, 16.18, 19.23

E haamaitai â vau i te Fatu i te mau tau atoa,
e vai tuutuu-ore â te arueraa iana i roto i to’u nei vaha ;
e arue atu to’u varua iana iho i roto i te Fatu,
ia faaroo mai te feia haehaa, e ia oâoâ !

Te fariu e nei te mata o te Fatu i te feia hamani-ino ra,
ei faaore roa i to ratou roo i nia i te fenua nei ;
Pii mai ratou, faaroo maira te Fatu ;
E e faaora oia ia ratou i to ratou atoa ra ahoaho ra.

Te fatata nei hoi te Fatu i te feia mafatu fatifati,
e e faaora oia i te feia aau taia ra.
E faaora te Fatu i te varua o tona mau tavini,
e e ore atoa hoi tei tiaturi iana ra e faautua hia ïa.

A taio tatou i te epitore piti a Paulo peata ia Timoteo (4, 6-8.16-18)

E ta’u tamaiti here ra, teie hoi tō’u toto a niniihia ei tutia, teie au a reva’ē. I ’aro na vau i te ’aroraa nehenehe, ua pū tō’u hororaa, ua tapea maite au i te faaroo. ’E teienei, ua faataahia te hei o te parautia no’u ; ’e na te Fatu, na te haava parautia ra e horoa mai i taua hei ra ei haamauruururaa ia’u, ia tae i taua mahana ra ; eiaha rā no’u anae ra, no te feia atoa ra i tiai i tōna fāraa mai. I tō’u faatiaraa matamua ia’u iho i mua i te tiripuna, aore roa e taata i turu mai ia’u ; ua faarue anae maira ratou ia’u, eiaha rā te reira ia hāio ti’a atu ia ratou ei hara. Na te Fatu rā i turu mai ia’u, ua faaitoito mai oia ia’u ia poro-hua-hia e au te parau tumu o te Evanelia, ’e ia faaroohia e te mau etene atoa ra. Ua faaorahia vau i te vaha o te liona. E faaora mai te Fatu ia’u i te mau opuaraa iino atoa ra, ’e e tiai mai oia ia’u, ia tae au i tōna ra Basileia i te ra’i ra. Ei iana te hanahana e a tau a hiti noa atu. Amene. - O te Parau ïa a te Atua.

ALLELUIA (cf. 2 Co 5, 19)

No te mea na te Atua i fa’afāite i to te ao nei iana iho na roto i te Kirito : ’e nana i tuu mai i te parau fa’afāite i roto i ta’u vaha.

A taio tatou i te Evanelia a Luka peata (18, 9-14)

I taua anotau ra, ua parau faahou atura Iesu i teie parabole no te tahi pae taata, o tei manao e, e feia parautia ratou ’e o teitahitohito i te mau taata atoa. « Haere atura e toopiti tau taata i te hiero e pure : e pharisea te hoe, e telona hoi te tahi. Ti’a noa ihora te pharisea, ’e ua pure ihora i roto iana iho, i te na ōraa e : “E tau Atua e, te haamaitai atu nei au ia oe i te mea e, e ere au mai te taata atoa nei : e feia eia hoi ratou ’e te hamani ino ’e te faaturi, ’e i te mea atoa hoi e ere au mai teie telona. Taipiti ā’u haapaeraa māa i te hebedoma hoe, e horoa vau i te ahuru o te mau taoa atoa e noaa mai ia’u.' Area te telona, te ti’a noa ra i te atea ’ē, ’e aore tana mata i nānā noa atu i nia i te ra’i, te papa’i noa ra oia i tana ouma ma te parau e : “e ta’u Atua e, aroha mai oe i te taata hara nei !” Te faaite atu nei au ia outou : i te hoiraa taua taata ra i te fare, ua ti’ahia mai oia, aore te tahi. O te taata hoi e faateitei iana iho, e faahaehaahia ïa ; o te faahaehaa rā iana iho, e faateiteihia ïa. » - Haapopou tatou i te Parau a te Atua.