DOMINIKA 31 NO TE TAU NOA

A taio tatou i te puta a te Paari (11, 23 – 12, 2)

O te ao atoa nei hoi i mua i to aro, e au i te hua iti haihai roa i roto i te faito ra, e mai te topata iti o te hau poipoi o te mairi i raro i nia i te fenua nei. Te aroha nei râ oe i te taata’toa, no te mea e tia ia oe te mau mea’toa nei ia rave, e aore oe i hio hua mai i te hara a te taata nei ia tatarahapa hoi ratou. Te here mai nei hoi oe i te mau mea’toa e vai nei, e aore roa oe i au ore mai i te mau ohipa’toa ta oe i rave na : aore hoi oe i haapao, e aore atoa i hamani i te hoe mea ei ririraa’tu na oe. E aha hoi te mau mea’toa nei e vai tamau ai, auaa i hinaaro hia e oe ? E e aha hoi e vai ai, auaa i tiaoro hia mai e oe ? Te faaherehere nei râ oe i te mau mea’toa nei, no te mea no oe ratou, e te Fatu e, o oe te hinaaro ia ora ratou. E aha ra te hamani maitai e te maru o to oe na varua, e te Fatu e, i te mau mea’toa nei. I papai riirii mai ai oe ia ratou i tei hahi è ra ; e ua aô mai oe ia ratou, e ua parau hua mai, i te mau mea i hapa’i ratou ra, ia haapae ratou i to ratou ra ino, e ia faaroo atu ia oe na, e te Fatu e. - O te Parau ïa a te Atua.

SALAMO 144,1-2, 8-9, 10-11, 13cd-14

E faateitei â vau ia oe, e te Arii, e ta’u Atua e,
e haamaitai â vau i to oe ra i’oa e a muri noa’tu,
E hinaaro vau i te haamaitai ia oe i te mau mahana’toa,
e arue au i to i’oa e a muri noa’tu, e a tau a hiti noa’tu.

E maru e te aroha te Fatu,
taere i te riri, î roa i te here ;

E maitai te Fatu i te taatoà raa :
E taea roa hia tona aroha faaherehere i nia i tana’toa ra mau ohipa.

Ia arue ta oe mau ohipa’toa ia oe, e te Fatu e,
e ia haamaitai to oe mau taua ia oe,
Ia parau ratou i te hanahana o to oe ra hau,
e ia faaite ratou i to oe mana.

E parau tia te Fatu i roto i tana mau parau atoa ra ;
e e aroha tona i tana mau ohipa’toa ra;
te mau nei te Fatu i te feia’toa e hiâ ra,
e te faatia nei ia ratou i tei fatifati.

A taio tatou i te epitore piti a Paulo peata i to Tesalonia (1, 11 – 2, 2)

E au mau taeae e, o te tumu ïa e pure tuutuu ore noa ai matou no outou, ia au mau ā outou i te nominoraa a te Atua, i te mahana a roohia mai ai outou e ana. Na roto i tōna mana, ia haamanuia oia i to outou mau hinaaro i te maitai, ’e ia faariro oia i to outou faaroo ei faaroo ohipa. E faateiteihia ïa te i’oa o to tatou Fatu o Iesu-Kirito i roto ia outou, ’e e faateitei-atoa-hia outou i roto iana, mai te au i te karatia a to tatou Atua ’e to tatou Fatu o Iesu-Kirito. I te parau o te haereraa mai o to tatou Fatu-Kirito ’e o to tatou haaputuputuraa i pihai iho iana, te ani atu nei matou, e te maua taeae e : eiaha na to outou mafatu ia aueue vave, eiaha atoa ia hitima’ue no te hoe tohu, ’e aore rā no te hoe parau, ’e aore rā no te hoe rata, o tei parauhia e, na matou ïa, a manao ai outou e, ua tae i te mahana o te Fatu. - O te Parau ïa a te Atua.

ALLELUIA (Ioa 3, 16)

I here mai hoi te Atua to te ao nei e tae roa atu i te horoa mai i tana Tamaiti fanau tahi, ia ore ia pohe te hoe a'e taata e faaroo iana, a roaa rã iana te ora mure ore.

A taio tatou i te Evanelia a Luka peata (19, 1-10)

I taua anotau ra, tomo atura Iesu i Ieriho, ’e ua haere atura na roto i te oire. Tei reira te hoe taata o Zakaio te i’oa ; o te taata rahi ïa o te mau telona, e taoa rahi hoi tāna. Te hinaaro ra oia i te hio ia Iesu, ia ite oia i tōna huru ; aita rā i ti’a iana no te rahi o te taata, e taata poto hoi oia. Ua horo atura oia na mua, ’e pa’i’uma a’era i nia i te hoe tumu sukamino e hio ia Iesu : e na reira hoi oia i te haere. E tae maira Iesu i taua vahi ra, nānā a’era tana mata i nia ’e ua parau atura oia iana : « E Zakaio, haapeepee oe i te pou mai i raro, ei tō fare hoi au e noho ai ’ā’uanei. » Pou oioi maira Zakaio i raro, ’e ua faarii atura ia Iesu i roto i tōna fare ma te oaoa rahi. Ite a’era te taata i te reira, ua ohumu ihora ratou, na ō a’era : « Ei te fare o te hoe taata hara oia e noho ai ! » Ti’a maira Zakaio i mua i te aro o Iesu, ’e ua na ō maira i te Fatu : « Inaha, e te Fatu e, e horoa vau i te afatia o tā’u nei mau taoa na te feia veve, ’e, i hamani ino noa atu vau i te tahi taata, e faahoi ai i tāna e ia taimaha a’e. » Ua parau a’era Iesu nona : « I teie nei mahana, ua tae mai te ora i roto i teie nei fare, no te mea e tamaiti atoa oia na Aberahama. I haere mai nei hoi te Tamaiti a te taata e tii i tei mo’e ra’e e faaora. » - Haapopou tatou i te Parau a te Atua.