32e dimanche T.O.

DOMINIKA 32 NO TE TAU NOA

A taio tatou i te puta piti no te mau Makabaio (7, 1-2.9-14)

I te mau mahana ra, e too hitu pue taeae, e to ratou ra metua vahine, tei haru hia, e ua mâro hia’tu e te arii e e amu i te iô puaâ ma te faahapa i te ture, e no reira ratou i haamauiui hia’i i te tairi e te uaua puaatoro. Ua naô atura râ te hoe o ratou ra, oia hoi te matahiapo : « E aha ta oe e hinaaro na i te ui, e ia ite atu oe ia matou nei ? Ua tia roa ia matou te pohe, eiaha roa râ matou ia faahapa i te mau ture a te Atua, tei no ô mai i to matou ra hui metua. » E ia fatata roa oia i te unuhi ra, ua naô atura oia : « E tenana taata parau ino roa e, te taparahi mau nei â oe ia matou i teienei oraraa, na te arii râ o te ao nei e faatia ia matou i nia i te tiafaahouraa, i te ora mure ore ra, matou o tei pohe no tana ra mau ture. » E i muri ae iana, o te tootoru ïa tei faariro hia ei tahitohitoraa, e ia titau hia’tura oia ua faatoro oioi maira oia i tona arero, e ua tuu mai hoi i tana pue rima ma te mataû ore : e ua naô maira ma te taia ore : « Mai te rai mai teie, i te noaaraa mai ia’u, no te mau ture râ a te Atua i vahavaha ai au i teie mau mea, no te mea te tiaturi nei au e, e roaa faahou mai â ïa ia’u iana ra. » E maere noa ihora te arii, e te feia i pihaiiho iana, i te mataû ore o taua taata api ra, mai te mea faufaa ore ra hoi te mauiui i tona ra hioraa mai. E ia pohe aera oia, ua na reira atoa’tura to ratou haamauiuiraa i te too maha. E ia fatata aera oia i te pohe, ua naô maira oia : « E maitai ae, ia taparahi hia mai i te taata nei, ma te tiaturi i te Atua ra e, ia faatia faahou hia e ana i nia ; area ia oe na, aore roa o oe e tiafaahouraa i te ora. »       - O te Parau ïa a te Atua.

SALAMO 17,1ab.3ab, 5-6, 8.15

A faaroo mai, e te Fatu e, i te parautia ;
a haapao mai i ta’u piiraa, a faaroo mai i ta’u pureraa.
Ua tamata oe i to’u mafatu, e ua hoi mai oe ia’u i te rui ;
ua tamata mai oe ia’u e aita e parau ino i itea mai.

Eiaha ta’u na avae ia pahee
i nia i to oe na mau éà.
Inaha vau, e te Atua e, te tiaoro atu nei au ia oe,
e ua faaroo mai oe.

A tiai mai ia’u i te feia i tia mai i to rima-atau, a tiai mai,
mai te orio mata ra, a huna ia’u i raro ae i to maru pererau ra.
Area, o vau nei ra, na roto i te parautia ta’u i ite i to mata e ia ara vau ra,
haa maha ïa vau i te hioraa i to oe ra hohoa.

A taio tatou i te epitore piti a Paulo peata i to Tesalonia (2, 16 – 3, 5)

E au mau taeae e, ua here mai to tatou Fatu o Iesu-Kirito ’e te Atua, to tatou Metua, ia tatou, ’e ua horoa mai i te haamahanahanaraa mure ore ’e te tiaturi maitai ; ia haamahanahana mai raua i to outou mafatu,’e ia haapapu mai ia outou i roto i te mau mea maitatai atoa ta outou e rave ’e ta outou e parau. ’E teienei, e au mau taeae e, a pure no matou, ia horo noa te parau a te Atua i tōna hororaa, ’e ia faahanahanahia taua parau ra mai tei io outou ne te huru, ’e ia ora tatou i te mau taata iino ’e te totoa ; e rave rahi hoi te taata e ore e faaroo. E haapao te Atua i tāna parau, nana e haapaari mai ia outou ’e nana e paruru mai ia outou i te ino. I roto i te Fatu ra, te tiaturi papu nei matou e : o ta matou e faaue atu nei ia outou na, o ta outou ïa e rave na ’e o ta outou ā e rave tamau noa. Ia aratai mai te Fatu i to outou mafatu i te here i te Atua ’e i te aho roa o te Kirito. - O te Parau ïa a te Atua.

ALLELUIA (Ap 1, 5a.6b)

Iesu-Kirito, te matahiapo o te feia pohe. No reira ei iana ra te hanahana ’e te mana e a tau a hiti noa atu.

A taio tatou i te Evanelia a Luka peata (20, 27-38)

I taua anotau ra, ua faafatata maira te tahi mau sadukea. I te mau sadukea, e ore te feia pohe e tiafaahou. Ua ui maira ratou iana : « E te orometua e, ua papai Mose no matou : E tuaana to te tahi taata, ’e ua pohe atura taua tuaana ra ma te tamarii ore ra, a ora noa ai tāna vahine, ia faaipoipo te teina i taua vahine ra e ti’a ai, ’e ia fanau oia i te tamarii ei huaai no tōna tuaana. I teienei rā, toohitu pu’e tamarii i roto i te hoe fetii. Faaipoipo ihora te matahiapo i te vahine,’e phoe atura, aita e tamarii. Faaipoipo ihora te toopiti i te vahine a tōna tuaana,’e pohe atoa atura ma te tamarii ore. Ua faaipoipo ihora te toototu i taua vahine ra, ’e ua na reira ratou atoa e tae noa atura i te toohitu, ua hope roa ratou i te pohe ma te tamarii ore. ’E muri roa a’era, pohe atoa atura taua vahine ra. Ia tae i te tiafaahouraa, e riro taua vahine ra ei vahine na vai i taua toohitu ra, inaha hoi, ua faaipoipo oia ia ratou toohitu atoa ra ? » Ua parau atura Iesu ia ratou : « E faaipoipo to teie nei ao, ’e e horoahia e faaipoipo. Area te feia i parauhia e, ua au ia ratou te ao a muri atu ’e te tiafaahouraa mai te pohe mai, e ore ïa e faaipoipo,’e e ore atoa e horohia ia faaipoipo. E ore tatou e pohe faahou, e au hoi ratou i te mau melahi, e tamarii ratou na te Atua, no te mea e tamarii ratou no te tiafaahouraa. I te tiafaahouraa rā o tei pohe, ua faaite hia mai te reira e Mose, i roto i te parau no te pū aihere ura ; ua papaihia hoi no te Fatu : o te Atua ïa no Aberahama ’e o te Atua no Isaaka ’e o te Atua no Iakoba. E ere oia i te Atua no tei pohe, o te Atua rā no tei ora ; te ora anae ra hoi ratou iana. » - Haapopou tatou i te Parau a te Atua.