33e dimanche T.O.

DOMINIKA 33 NO TE TAU NOA

A taio tatou i te puta a Malakia Peropheta (4, 1-2a)

Inaha te haere mai nei te mahana, mai te umu ra i te amaraa ; e e riro te feia teoteo atoa e ratou atoa tei haapao paieti ore, mai te aihere ra ; e na te mahana te haere mai nei e faaora ia ratou, ma te vaiiho ore i te ââ e te ohi no ratou ; te na reira maira te Fatu o te mau nuu. No outou ra no tei mataû i to’u nei ioa, e hiti ïa te Mahana o te parautia, e ora hoi te i roto i tona pererau. - O te Parau ïa a te Atua.

SALAMO 97 (98.), 5-6, 7-8, 9

A himene i te Fatu ra ma te kitara,
ma te kinura e ma te reo nabala ;
ma te pu tupai hia, e ma te oto o te pu tara
ia haruru te reo oâoâ i mua i te Fatu to tatou arii.

Ia arepurepu te tai, e tona ra îraa,
te ao atoa nei e te feia’toa e parahi i roto ra ;
ia paipai te mau anavai i to ratou rima,
e ia umere tahi te mau moua.

I te aro o te Fatu, te haere maira hoi oia
e haava i te fenua nei.
E haava oia i te ao atoa nei ma te parautia,
e te mau taata ma te pio ore.

A taio tatou i te epitore piti a Paulo peata i to Tesalonia (3, 7-12)

E au mau taeae e, ua papu ia outou e nafea outou ia pee mai ia matou ; ia matou io outou ra, e ere ïa to matou i te oraraa arepurepu. Aita matou i titau noa a’e i te māa ta matou i amu, ua haa rā matou, ’e ua rave i te ohipa ma te rohirohi, i te pō ’e te ao, ia ore te hoe o outou ia teimaha ia matou. E ere rā mai te mea e, eita e ti’a ia matou ia titau atu i te māa, ua hinaaro rā matou ia riro matou ei hioraa na outou, ia rave atoa outou i te ohipa, mai ia matou atoa nei. Inaha hoi, ia matou ā i pihai iho ia outou na, ua faaue atura matou ia outou : te taata e ore e hinaaro e rave i te ohipa, eiaha atoa oia e amu i te māa. Ua tae mai hoi ia’u te parau e : te vai ra, i roto ia outou, te taata oraraa arepurepu, ta ratou ohipa o te faahua taata ohipa. Te a’o atu nei matou i taua mau taata ra, ’e te faaue atu nei i te i’oa o te Fatu ra o Iesu-Kirito : ia rave  ratou i te ohipa ma te hau, ’e ia amu ratou i te māa i roaa i ta ratou iho ohipa. - O te Parau ïa a te Atua.

ALLELUIA (Luk 21, 28)

E nānā to outou mata i nia, e e faateitei to outou upoo, ua fatata roa hoi ïa to outou ora.

A taio tatou i te Evanelia a Luka peata (21, 5-19)

I taua anotau ra, ’e, te parauparau ra te tahi mau taata no te hiero o te faaunaunahia i te ofai nehenehe ’e no te mau ō hoi i pūpūhia mai e te feia faaroo ei faaunaunaraa, ua parau atura Iesu : « Teie mau mea ta outou e mataitai nei, te faata mai ra te mahana e ore e toe ai te hoe ofai i nia iho i te tahi, e pau roa i te hurihia i raro. » Ua ui maira ratou : « E te orometua, afea te reira e tupu ai, ’e e aha te tapao e faaite mai e, ua fatata roa i te tupu ? » Ua parau atura Iesu : « E ara ia outou, ia ore outou i avare ;  e rave rahi hoi te haere mai ma tō’u nei i’oa, i te na ōraa e : “O vau te Mesia”, ’e : “ua tae i te tau.” Eiaha outou e pee atu ia ratou. Ia faaroo outou i te roo tama’i ’e te roo oruehau, eiaha a mata’u, ia na mua te reira i te tupu e ti’a ai, e ore roa rā e tae vave i te hopea. » Ua parau atura oia : « E ti’a mai te tahi nunaa e ’aro i te tahi ’e te tahi basileia e ’aro i te tahi. E tupu te aueueraa fenua rarahi i tera vahi ’e i tera vahi ’e te ma’i pee hoi ’e te o’e e te peu mehameha no ō mai i te ra’i ra ’e te tapao maere rahi. Hou rā taua mau mea atoa ra a tupu ai, e haruhia outou ’e e hamani-ino-hia ; e tuuhia outou i te mau sunago, ’e e hurihia i roto i te fare tapearaa ; e arataihia outou i mua i te aro o te arii ’e te tavana no tō’u nei i’oa. E riro te reira ei ravea e ti’a ai outou ei ite no’u. ’E tenāna, ia papu to outou mafatu e, eiaha e faaineine i te parau ei parururaa ia outou. Na’u hoi e horoa atu ia outou i te parau’e i te paari e ore ai e ti’a i te feia e faahapa mai ia outou ia patoi mai ’e ia mārō mai. ’E na to outou iho metua tane ’e to outou metua vahine ’e to outou mau taeae’e to outou mau fetii’e to outou mau hoa e tuu ia outou i te haavaraa. ’E, na roto ia ratou, e pohe te tahi pae o outou na. No tō’u nei i’oa, e au-ore-hia outou e te taata atoa. E ore rā te hoe a’e rouru o to outou upoo e mo’e. E tamau maite ā outou, e na reira outou i te ora. »       - Haapopou tatou i te Parau a te Atua.