DOMINIKA 34 NO TE TAU NOA

O IESU-KIRITO, TE ARII O TE AO NUI

Oro'a hanahana

A taio tatou i te puta piti no te mau Arii (5, 1-3)

I te mau mahana ra, e ua haere te mau opu atoa o Iseraela i Hebedrona ia Davida ra, i te naôraa e : « Inaha, o matou nei, to oe ïa ivi, e to oe ïa iô ! Mai inanahi mai e mai inanahi atu mai hoi, a arii ai o Saula i nia ia matou, o oe â tei aratai ia Iseraela i rapae e tei faahoi mai i roto : Ua parau mai hoi te Fatu ia oe : “Na oe e faaamu i to’u ra nunaa ia Iseraela, e ei aratai oe i nia ia Iseraela.” » Ua haere atoa maira te feia paari o Iseraela iô te arii i Heberona, e ua faaau te arii ra o Davida i te faufaa ia ratou i Heberona i mua i te Fatu ra ; ua faatahinu ihora ratou ia Davida ei arii i nia ia Iseraela ra. - O te Parau ïa a te Atua.

SALAMO 121,1-2, 3-4, 5-6

Aue ta’u oâoâ, a parau hia’i au e :
« Mai haere tatou i te fare o te Fatu ! »
Te i roto tatou, ua faaea to tatou haerea ;
Te i roto matou i to mau uputa, e Ierusalema e !

Ierutalema, o tei patu hia mai te hoè oire
e te mau tairururaa paatoa e riro ai ei tino hoè,
I reira te mau opu e a’e ai i nià te mau opu a te Fatu,
no te faahanahana, mai te au i te faaueraa i Iseraela, i te ioa o te Fatu’oa o te Fatu.

I reira te mau nohoraa haavaraa te haamauraa hia,
te mau nohoraa o te utuafare o Davida.
A tiaoro outou i te hau i nia ia Iseraela :
« Ei hau i nia i to oe na mau tiahapa ! »

A taio tatou i te epitore a Paulo peata i to Kolosa (1, 12-20)

E au mau taeae e, e haamaitai outou i te Metua, o tei faaau ia outou, ia noaa atoa ia outou te hoe o te ’āi’a o te feia mo’a i roto i te maramarama. Ua faaora oia ia tatou i te mana o te pouri, ’e ua tahiti ’ē mai ia tatou i roto i te Basileia o te Tamaiti here nana. Nona i noaa ai ia tatou te ora ’e te matararaa o ta tatou mau hara. O te hohoa mau oia o te Atua itea-ore-hia ia hio, o te matahiapo o te mau mea atoa i poitehia. I roto hoi iana i poietehia ai te mau mea atoa i te ra’i ra ’e i te fenua nei, te mau mea itea ia hio ’e i te mau mea itea-ore-hia ia hio, te hui terono, te hui hau, te hui arii ’e te hui mana.Ua poietehia e ana te mau mea atoa ’e nona anae hoi. O mua oia i te mau mea atoa ra, ’e te haamauhia nei e ana te mau mea atoa ra. ’E o oia te upoo o te tino, oia hoi te Etaretia, o oia te matamua, o te matahiapo oia o te feia i tiafaahou mai roto mai i tei pohe ra (ia tia oia i te tiaraa matamua i te mau vahi atoa). Ua ti’a hoi i te Atua i te tuu i roto iana i te ï o te mau mea atoa ra, ’e i te fa’afāite iana iho i te mau mea atoa na roto iana ’e nona ra, i te ra’i ra ’e i te fenua nei. Ua faatupu hoi te Atua i te hau na roto i te toto o tōna ra tatauro. - O te Parau ïa a te Atua.

ALLELUIA (cf. Mar 11, 9b-10a)

Ia haamaitaihia oia o te haere mai nei ma te i’oa o te Fatu ! Ia haamaitaihia te Hau e fatata mai nei, o to tatou metua o Davida.

A taio tatou i te Evanelia a Luka peata (23, 35-43)

I taua anotau ra, no faatatauro noa hia ino nei Iesu, te ti’a noa ra te taata e rave rahi i te hio-noa-raa. Area te hui mana, te ’ata tahitohito maira ïa i te na ōraa e : « Ua faaora oia ia vetahi ’ē ; o oia te Mesia a te Atua, o oia tei maitihia a te Atua ra, ia faaora ïa oia iana iho ra. » Ua tahitohito atoa maira te mau faehau iana : ua faafatata maira ratou iana, e pūpū mai i te vineta ’e ua parau maira : « O oe te arii o te Ati-Iuda ra, a faaora ïa ia oe iho na. » E parau atoa tei papaihia i nia a’e iana : « O te arii teie o te Ati-Iuda. » Ua faaino atoa maira te hoe o na taata hamani ino i faatataurohia ra : « E ere anei oe i te Mesia ? A faaora ïa oe ia oe iho ’e ia maua atoa nei hoi. » Ua ’avau maira rā te tahi iana, i te na ōraa e : « Aita anei oe i mata’u i te Atua. Hoe ā utua ta orua ; e mea ti’a roa rā teie utua no taua nei, o te utua mau ïa i te ohipa ta taua i rave ; area oia, aita ïa āna e ohipa ino. » ’E ua parau atura oia : « E Iesu, haamanao mai oe ia’u, ia tae mai oe ma to oe mana arii ra ! » Ua pahono atura Iesu : « Oia mau tā’u e parau atu nei ia oe na, ei te paradaiso oe ’e o vau atoa nei i teie nei ā mahana. » - Haapopou tatou i te Parau a te Atua.