3e dimanche de Carême

TE DOMINIKA 3 NO TE MAHA AHURURAA

TE TAHI MAU TAIORA E AU IA HAAPAOHIA :

E tia, i roto i te mau amuiraa i faaineinehia ai te feia paari i te Bapetitoraa, ia rave i te Evanelia e te mau Taioraa o te dominika 3 no te tau maha ahuru raa o te matahiti A : Ex 17, 3-7 ; Sal 94 ; Rom 5, 1-2.5-8 ; Ioa 4, 5-42

A taio tatou i te puta Exodo (3, 1-8a.13-15)

I te mau mahana ra, tiai maira o Mose i te nana mamoe a tona metua hoovai ra a Ietero, tahua i Madiana ; ua aratai atura oia i taua nana ra i te atea roa i roto i te medebara, e tae atura i te moua o te Atua ra i Horeba. Ua fâ maira te Fatu iana i roto i te auahi ura i ropu i te hoe pu aihere, e ua hio aera oia te ama noa ra te auahi, e aore taua pu aihere ra i pau i te auahi. Ua naô aera Mose : « E haere au, e hio vau i teie orama rahi i te mea i ore i pau taua pu aihere i te auahi ra. » E hio maira te Fatu, e te haafatata’tura oia e hio, ua pii maira oia iana, mai roto mai i te pu aihere ra, e ua naô maira : « E Mose, e Mose e ! » Ua parau atura oia : « Teie au ! » Ua naô maira oia : « Eiaha oe e haafatata mai ionei ; a iriti i to tama i to avae ra ; teie vahi ta oe e tia nei, e vahi moâ ïa ! » E ua naô atoa mai : « O vau te Atua o to metua, te Atua o Aberama, te Atua o Isaaka, te Atua o Iakoba. » Ua purou aera Mose i tona mata, te mataû ra oia e tutonu i te Atua. Ua parau maira te Fatu iana : « Ua hio vau i te ati o to’u ra nunaa i Aiphiti ; e ua faaroo aera vau i to ratou aue rahi no te ââu etaeta rahi o te feia faaau ohipa i nia ratou ra. E ua ite au i to ratou oto, i haere mai au i raro e faaora ia ratou i te rima o to Aiphiti, e e aratai atura ia ratou mai teie atu fenua i to hoe fenua maitai e te atea, i te fenua i tahe pape noa te û et te meri, i te mau fenua no te Ati-Kanaana. E haere mai oe, e e tono atu au ia oe ia Pharao ra ia aratai mai oe i to’u mau taata ra, te mau tamarii a Iseraela, mai Aiphiti maira. » Ua parau atura Mose i te Atua : « Teie au, e haere atu au i te mau tamarii a Iseraela, e e parau atu au ia ratou : ‘Na te Atua o to outou hui metua, o vau i tona mai outou na.’ Ia naô maira ratou ia’u nei e : O vai tona ioa ? E nafea’tu au ia ratou ra ? » Ua parau maira te Atua ia Mose : « O VAU ÏA E VAI NEI. E ua naô mai â oia : ‘E parau atu oe i te mau tamarii a Iseraela : O VAU E VAI NEI, i tono mai ia’u ia outou na’. » Ua parau faahou maira te Atua ia Mose : « Teie ta oe e parau i te mau tamarii a Iseraela : ‘Na te Fatu, na te Atua o to outou mau metua, na te Atua o Aberahama, na te Atua o Isaaka, e na te Atua o Iakoba o vau i tono mai ia outouna.’ O to’u ïa ioa e a muri noa’tu ; e faaite hia’i au i tera ui i tera ui. » - O te Parau ïa a te Atua.

SALAMO 102, 1-2, 3-4, 6-7, 8.11

A haamaitai i te Fatu, e ta’u Varua e.
Ia haamaitai au i tôna i’oa mo’a hau ‘ê, ma tô’u mafatu atoa.
A haamaitai i te Fatu, e ta’u varua,
eiaha te hoe hamani maitai nona ia aramoina ia oe.

Nana hoi e faaore i ta oe mau hara atoa,
nana e faaora i to oe atoa mau ma’i.
Nana e faaora ia oe i te menema ra,
nana e faahei ia oe i te hamani maitai e i te here.

E ohipa parautia anae ta te Fatu,
e paruru oia i te feia atoa i hamani-ino-hia.
Ua faaite oia i tôna mau e’a ia Mose,
ua faaite oia i tana mau ohipa mana i te tamarii a Iseraela.

E aroha e te hamani maitai to te Fatu,
e faaoroma’i rahi tôna, e ua ï oia i te aroha.
Mai te teitei o te ra’i i nia i te fenua nei,
oia atoa tôna aroha i te feia e mata’u iana.

A taio tatou i te epitore matamua a Paulo peata i to Korinetia (10, 1-6.10-12)

Aita vau i hinaaro, e au mau taeae, ia ore outou ia ite e, i raro a’e anae to tatou hui metua i te ata, ’e ua haere paatoa ratou na raro i te tai. I to tatou peeraa atu ia Mose, ua papetito-anae-hia ratou i roto i te atea’e i raro hoi i te tai. ’E ua amu anae ratou i te māa varua hoe ra, ’e ua inu paatoa ratou i te inu varua hoe ra, i inu na hoi ratou i to roto mai i te mato varua e pee mai ra ia ratou, ’e taua mato ra, o te Kirito ïa. Aita rā te Atua i mauruuru i te rahiraa o ratou, inaha hoi to ratou mau ’ōivi ua tarava noa ïa i te vahi ’e i tera vahi i roto i te medebera. Ua tupu te reira ei hioraa na tatou : ia ore tatou ia nounou i te mau mea iino, mai ia ratou i nounou ra. Eiaha atoa outou e ohumu, mai te tahi pae i ohumu ra, ’e ua taparahia atura e te melahi taparahi. Ua roohia ihora ratou e taua mau mea ra ei hioraa na tatou, ’e ua papaihia te reira ei haapiiraa na tatou, o tei tae mai i te hopea o te tau. ’E teienei, o tei manao e, te ti’a ra oia, e ara oia, ’o te hi’a oia i raro. - O te Parau ïa a te Atua.

IRAVA I MUA I TE EVANELIA (Mt 4, 17)

Ei hanahana i te Kirito, te paari etereno o te Atua ora. Ei hanahana ia oe, e te Fatu e.
Ua parau atura oia ia raua te Fatu : a tatarahapa, ua fatata mai nei hoi te Basileia o te Atua.
Ei hanahana i te Kirito, te paari etereno o te Atua ora. Ei hanahana ia oe, e te Fatu e.

A taio tatou i te Evanelia a Luka peata (13, 1-9)

I taua hora ra, tae maira te tahi mau taata, o tei faaite i Iesu i te parau no te mau taata Galilea ta Pilato i anoi i to ratou i te toto o ta ratau mau tutia. Ua parau atura oia ia ratou : « I to outou na manao, e rahi a’e anei te hara a taua mau taata ra i ta to Galilea atoa ra, i roohia ai ratou i taua ati ra ? Te faaite atu nei au ia outou : aore. Ia ore ra outou ia tatarahapa, e ope outou i te pohe, mai ia ratou atoa ra. ’E na taata tino ahuru ma va’u i mairihia e te pā i Siloe ra e pohe ihora, i to outou manao, e hau anei ta ratou hara i ta to Ierusalema atoa ra ? Te faaite atu nei au ia outou : aore. Ia ore rā outou ia tatarahapa, e pohe outou atoa, mai ia ratou ra. » ’E ua parau atura Iesu i teie nei parabole : « E tumu suke tei tanuhia i roto i te ’ō vine a te hoe taata. Haere maira oia i tii i te māa i nia i taua suke ra, ’e aita hoi. Ua parau atura oia i te taata faaapu vine : ‘A toru a’enei matahiti vau i te haereraa mai e tii i te māa i nia i teie suke, ’e aita i itea ia’u ; a tāpū maoti oe : e api te fenua i teie tumu faufaa ore ?’ Ua pahono maira te taata faaapu : ‘E te fatu e, vaiiho noa ana oe i teie ā matahiti, e utaru vau e ati noa a’e, ’e e tuu vau i te para. Penei a’e ’o te hotu mai, ’e, ia ore anae, e tāpū ïa oe.’ » - Haapopou tatou i te Parau a te Atua.