3e dimanche de l'Avent

TE DOMINIKA 3 NO TE TAU AVENETE

A taio tatou i te puta a Sophonia peropheta (3, 14-17)

A arue, e te tamahine a Siona, aoâoâ, e Iseraela e, a popou, e a umere i to mafatu atoa, e te tamahine o Ierusalema e. Ua faaore te Fatu i te parau haavare, ua faafariu è atu oia i to oe mau enemi ; te i ropu ia oe te Fatu, te arii o Iseraela, e ore oe e mataû faahou i te tino. I te reira mahana, e parau hia o Ierusalema e : « Eiaha e mataû, e Siona e ! E ore paruparu to oe na rima ! O te Fatu, to Atua, te i ropu ïa ia oe ma te puai, nana e faaora ; e popou oia ia oe ma te oâoâ ; e faaea oia i tona here ia oe ; e popou oia oe ma te arueraa. »    - O te Parau ïa a te Atua.

HIMENE Is 12, 2-3, 4bcde, 5- 6

Inaha o te Atua o to’u Faaora ïa,
e tiaturi au, e e ore au e mataû :
o to’u hoi ïa puai, e to’u ïa arueraa,  o te Fatu ïa ;
e ua riro mai oia ei ora no’u :
E e huti outou i te pape ma te oâoâ no roto mai
I te mau tumu o te Faaora ra.

A haamaitai outou i te Fatu,
a tiaoro atu i tona ra ioa :
a faaite i te taata i tana mau ravea puai ;
a haamanao e, e ioa hanahana tona.

A himene outou i te Fatu i te mau ravea hau ae nana ra :
e a faaite haere i te reira i te fenua’toa ra.
A umere ma te oâoâ, e a arue, e te utuafare o Siona ra e :
te rahi rahoi tei Moâ i Iseraela nei i rotopu ia oe na.

A taio tatou i te epitore a Pauro peata i to Philipi (4, 4-7)

E au mau taeae e, e oaoa i te Fatu ma te tuutuu ore ; te parau faahou atu nei au : ia oaoa outou. Ia itehia to outou marū e te taata atoa. Ua piri roa mai te Fatu. Eiaha to outou manao ia tapitapi i te hoe noa a’e mea. E pure rā outou no te mau mea atoa, ’e e faaite i te Atua i ta outou mau aniraa na roto i te ta’uraa ma te haamaitai. Ei reira ïa te hau o te Atua, o tei hau ’ë atu i te feruriraa taata, e tiai mai ai i to outou mau mafatu ’e i to outou mau manao i roto ia Iesu-Kirito. - O te Parau ïa a te Atua.

ALLELUIA (cf. Is 61, 1)

Te i nia ia’u te Varua o te Fatu ra, ua tono mai oia ia’u ia faaite i tana parau i te feia maru.

A taio tatou i te Evanelia a Luka peata (3, 10-18)

I taua anotau ra, ua ui maira to taua tiaa rahi ra ia Ioane, na ō maira : “E nafea ïa matou ?” Ua pahono atura oia ia ratou : “Te taata e piti tōna ahu ra, e horoa atu oia i te hoe na tei ere, te taata e māa tāna ra, e na reira atoa”.Ua haere atoa mai te mau telona, ia papetitohia ratou, ’e ua na ō maira iana : “E Rabi, e aha matou ?”. Ua parau atura oia ia ratou : “Eiaha e titau atu i te moni, maori ra i tei faauehia mai ia outou”. Ua ui atoa maira te faehau iana : “E matou, e nafea ïa ? ”. Ua parau atura oia : “Eiaha outou e faahepo noa atu i te taata, eiaha outou e pari haavare, ia ravai noa outou i ta outou iho moni taime. Te tiai noa ra te taata atoa, ’e te uiui noa ra i roto ia ratou iho : “E ere anei o Ioane i te Mesia ? ”. Ua parau atura Ioane ia ratou atoa : “Te papetito atu nei au ia outou i te pape, te haere mai nei rā oia o tei hau roa tōna mana i tō’u ; eita vau e au i te tatara i te tapea o tōna tāma’a ; e papetito oia ia outou i te Varua-Maitai ’e te auahi. Tei tōna rima tāna petou, no te tamā i tāna papa’iraa sitona ’e no te haaputu i tāna sitona i roto i te vairaa sitona ; area te paa ra, e tutu’i ïa oia i roto i te auahi pohe ore. E rave rahi atu ā ta Ioane mau a’oraa, no te faaite i te parau oaoa i te nunaa Iseraela. - Haapopou tatou i te Parau a te Atua.