4e dimanche de l'Avent

TE DOMINIKA 4 NO TE TAU AVENETE

A taio tatou i te puta a Mikea peropheta (5, 2-5a)

Te parau a te Fatu : E o oe, e Betelehema Epherata e, e iti oe i ropu i te mau tauatini o Iseraela ; area no roto mai ia oe e haere mai o te riro iana te hau, i Iseraela nei ; mai mua mai tona haereraa mai, mai te mau mahana etereno mai â. No reira, e tuu noa oia ia ratou e tae noa’tu i te tau e fanau mai ai te vahine fanau ra, e i reira e hoi mai ai te mau toea o tona mau taeae ra i te mau tamarii o Iseraela. E tia oia, e e faaamu oia i tana nana ma te puai o te Fatu, i te teitei o te ioa o te Fatu, tona ra Atua ; e e fariu mai te mau nunaa no te mea, e i reira e faahanahana hia’i oia e tae noa’tu i te mau otia o te fenua nei. E faatupu oia i te hau. - O te Parau ïa a te Atua.

SALAMO 79 (80), 2.3bc, 15-16a, 18-19

E faaroo mai, e te tiai ia Iseraela e,
o oe tei aratai te nana ra ; a anaana mai.
A faara i to puai ra,
a haere mai e a faaora ia matou !

A hoi mai, e te Fatu, te Atua no te mau nuu,
a hio mai mai te rai mai, ia ite,
A mataitai i teienei ô vine :
a paruru oe iana, oia i tanu hia e to rima atau !

E i nia to rima i te taata o to rima atau na,
e i nia i te tamaiti a Adamu i haapapu hia na oe ihora !
E ore roa matou e taiva ia oe ;
na oe matou e faaanaanaea, ia taû atu â matou i to oe na io’a.

A taio tatou i te epitore i te mau Hebera (10, 5-10)

E au mau taeae e, no reira, i tōna tomoraa mai i te ao nei, ua na ō atura te Kirito : Aita a’enei i ti’a ia oe te tutia ’e te pūpū raa, au faanahonaho mai rā oe i te hoe tino no’u. Aita oe i mauruuru i te tutia taauahi ’e te tutia taraehara. Na ō atura vau : Teie au, no’u hoi te parau i papaihia i roto i te otaro o te puta ra, te haere mai nei au, e te Atua e, e faatia i to oe na hinaaro. Ua parau na ioia : Aita a’enei i ti’a ia oe te tutia, te pūpūraa, te tutia taauahi, ’e te tutia taraehara ; aita oe i mauruuru i te reira, pūpūnoa-hia atu nei ai te reira ia au i te ture ra. E, i muri mai, ua na ō atura oia : Inaha, te haere mai nei au e faatia i to oe hinaaro. Te faaore nei ïa oia i tei mutaa iho ra haapaoraa, ’e te faatia nei oia i te piti. No te mana o taua hinaaro ra i haamo’ahia ai tatou nei, na roto i te pūpūraa hoe roa i te tino o Iesu-Kirito. - O te Parau ïa a te Atua.

ALLELUIA(Luk 1, 38)

Inaha ei tavini au no te Fatu : ia na reirahia mai au ta oe i parau mai na.

A taio tatou i te Evanelia a Luka peata (1, 39-45)

Ti’a a’era Maria i taua mau mahana ra, ’e ua haere oioi atura i te hoe oire no Iuda, i te mau vahi mou’a ra. Ua tomo atura oia i roto i te fare o Zakaria, ’e ua aroha atura ia Elisabeta. E tei te faarooraa mai Elisabeta i to Maria aroharaa atu iana ra, ou’au’a ihora te tamaiti i roto i tōna opu, ’e ua a’era Elisabeta i te Varua-Maitai. Ua pii hua maira oia ma te reo puai, na ō maira : « O oe tei haamaitaihia i rotopu i te mau vahine atoa, ’e ua haamaitai-atoa-hia te huaai o to oe na opu. O vai hoi au, i tae mai ia’u nei te metua vahine o tō’u Fatu. Inaha hoi, i te ōraa mai ā tō reo aroharaa i roto i tō’u nei taria, uaou’au’a ihora te tamaiti i te oaoa, i roto i tō’u nei opu. E ao to oe, o oe i faaroo ! E tupu hoi te mau parau i faaitehia mai ia oe na roto i te faaueraa a te Fatu. »  - Haapopou tatou i te Parau a te Atua.