6e dimanche T.O.

DOMINIKA 6 NO TE TAU NOA

A taio tatou i te puta a Ieremia peropheta (17, 5-8)

Ua parau atura oia ia raua te Fatu : E katara hia te taata tei tiaturi i te taata, e tei faariro i te iō taata ei rima nona, e o tei faataa è atu i tona mafatu i te Fatu ra. E riro oia mai te mirika i roto i te medebara, e aore oia i ite i te maitai ia tae mai ; area e parahi i te vahi māro, i toto i te medebara, i te fenua taitai, e te ore e au ia parahi hia. E ao to te taata tei tiaturi i te Fatu, e tei riro te Fatu ei tiaturiraa nana. E riro hoi mai te raau i tanu hia i te pae pape, o tei faararirari i tana mau āā : e ore e peapea i te veavea. Te vai heeuri noa ra tona rau, e ore oia e peapea i te anotau poai, e ore e faaea i te hotu mai i te maā. - O te Parau ïa a te Atua.

SALAMO 1, 1-2, 3-4a, 4b.6

E ao to te taata ore i tae atu i te apooraa a te feia paieti ore,
aore atoa i faaea noa na nia i te éà a te feia hapa-haere noa ra,
aore atoa hoi i parahi i nia i te parahiraa o te feia hoata noa ra ;
o te taata mauruuru râ i roto i te ture a te Fatu,
e o tei faahiti maru noa i tana ture i te ao e te rui !

E au oia i te raau i tanu hia i te hiti anavai ra,
o te hotu mai i te maâ i tona ra tau,
e ore roa hoi tona rau i oriorio atura ;
e e manuia tana’toa ra e rave ra.
E ere mai te reira te feia iino,

E au râ ratou i te ota i puhia è hia e te mata’i :
ua ite hoi te Fatu i te éà o te feia parautia,
area râ te haereà o te feia paieti ore, o te pohe ïa.

A taio tatou i te epitore matamua a Paulo peata i to Korinetia (15, 12.16-20)

E au mau taeae e, ia poro-haere-hia e, ua tiafaahou te Kirito mai roto mai i tei pohe ra, e aha ïa te tahi pae no outou e parau ai e, e ore tei pohe e tiafaahou ? Ia ore hoi te feia pohe e tiafaahou, aita atoa te Kirito i tiafaahou. Aita te Kirito i tiafaahou ra, e faaroo faufaa ore ïa to outou, tei roto noa ā hoi outou i ta outou mau hara. ’E te feia i taoto i roto i te Kirito ra, ua mou roa ïa. No teie anae nei oraraa tatou i tiaturi ai i te Kirito, e ati rahi ïa to tatou i to te taata atoa. Teienei rā, ua tiafaahou mau ā te Kirito mai roto mai i tei pohe ra, oia te matamua o te feia i mairi to ratou taoto. - O te Parau ïa a te Atua.

ALLELUIA (Luk  6, 23)

Ua parau atura oia ia raua te Fatu : ia popou ïa outou 'e ia ou'au'a i te oaoa e utua rahi hoi ta outou i nia i te ra'i.

A taio tatou i te Evanelia a Luka peata (6, 17.20-26)

I taua anotau ra, ua pou maira Iesu i raro ’e o ratou atoa, ’e ua faaea ihora i te hoe vahi papu. Tei reira tāna mau pipi e rave rahi ’e te hoe tiaa rahi taata no Iudea, no Ierusalema, ’e no te pae tatahi i Turia ’e o Sidonia. Nānā a’era Iesu i nia i tana mau pipi, ’e ua parau atura : « E ao to outou, e tei veve : no outou hoi te Basileia o te Atua ! E ao to outou, e tei poia i teienei : e paia hoi outou ! E ao to outou, e tei oto i teienei : e ’ata hoi outou ! E ao to outou, ia riri roa mai te taata ia outou ’ē ia outou ’e faaino mai ia outou ’e ia tahitohito mai, no te Tamaiti a te taata. Ia popou outou i te reira mahana ’e ia ou’au’a i te oaoa : Inaha hoi, e utua rahi ta outou i nia i te ra’i ; ua na reira hoi to ratou hui tupuna i te mau peropheta ra. E ati rā to outou, e te feia taoa e : ua noaa hoi to outou tamahanahanaraa ! E ati to outou, e tei paia i teienei : e poia hoi outou ! E ati to outou, e tei ’ata i teienei : e heva hoi outou ’e e oto ! E ati to outou, ia haamaitai te taata atoa ia outou : ua na reira hoi to ratou hui tupuna i te mau peropheta haavare ra. » - Haapopou tatou i te Parau a te Atua.