7e dimanche de Pâques

DOMINIKA 7 no PAKATE

A taio tatou i te Ohipa a te mau Apotoro (7, 55-60)

I te mau mahana ra, te tia noa raa Setephano i mua i te feia i faahapa mai iana. Area oia ra, ua ï a’era ïa i te Varua-Maitai ; Ua tiatonu atura oia i te ra’i, ’e ua ite atura i te hanahana o te Atua ’e ia Iesu i te ti’araa i te rima atau o te Atua. Ua na ô a’era oia : « Inaha, te ite atu ra vau i te ra’i, ua vevetehia, ’e ’e te Tamaiti a te taata i te ti’araa i te rima atau o te Atua. » Porutu maira to ratou reo, opanipani ihora i to ratou taria, horo pupara noa maira ratou atoa i nia iana ra. Aratô atura iana i rapae i te oire, ’e ua ’e ua pêhi atura iana i te ofai. Ua tuu atura te mau ite i to ratou ahu i te pae avae o te hoe taata api, o Saulo te i’oa. A pêhi noa ai ratou iana i te ofai, te pure ra Setephano, i te na ôraa : « E te Fatu e, a faarii mai oe i ta’u varua. » Ua tuturi ihora  oia i raro, ’e ua tiaoro hua atura : « E te Fatu e, eiaha oe e haamairi i teie hara i nia ia ratou. » Tei te parauraa oia i taua parau ra, mairi atura tôna taoto. - O te Parau ïa a te Atua.

SALAMO 96 (97), 1-2b, 6.7c, 9

Te i te Fatu te hau ! Ia rearea te fenua nei,
e ia oâoâ te mau motu e raverahi !
O te parautia e te parau au o te tumu ïa o tona ra terono.

Te faaite mai te mau rai i te parautia nana,
e ua ite te taata’toa i tona hanahana.
Haamori iana, outou atoa, e te mau atua’toa ra !

O oe hoi te Fatu tei teitei
i te fenua’toa nei,
te i nia roa oe i te mau atua’toa ra.

A taio tatou i te Apokalupo a Ioane peata (22, 12-14.16-20)

O vau o Ioane, ua faaroo vau i te hoe reo i te naō raa mai e : « Inaha te haere vave atu nei au, ’e tei ia’u nei tâ’u utua, ia horoa vau i te taata atoa i tei au i ta ratou ra ohipa. O vau te Alepha ’e te Omega, te matamehai ’e te faahopea, te haamataraa ’e te hoperaa. E ao to te feia e tama i to ratou ahu, e ti’a hoi ia ratou ia amu i to te raau o te ora ra ’e ia tomo na te uputa i roto i te oire ra. O vau nei, o Iesu, ua tono atu vau i ta’u melahi e faaite i teie nei mau parau no te mau Etaretia. O vau te ohi no te huaai o Davida, te fetia poipoi anaana ra. » Te parau apipiti nei te Varua e te vahine faaipoipo api : « Haere mai ! » ’E o tei faaroo ra, ia parau atoa oia e : « Haere mai ! » O tei poiha ra, ia haere mai oia ; o tei hinaaro ra, ia haere mai oia ’e ia faarii i te pape ora e horoa-noa-hia nana ra. Te na ô maira tai faaite papu i teie nei mau parau : « Oia mau, te haere vave atu nei au. » - Amene ! A haere mai, e te Fatu, e Iesu e ! - O te Parau ïa a te Atua.

ALLELUIA (cf. Ioa 14, 18)

Ua parau atura oia ia raua te Fatu : Aita te Fatu i vaiiho otare mai ia outou : e hoi mai â oia io outou, i reira ia to outou mafatu e ite ai i te oaoa.

A taio tatou i te Evanelia a Ioane peata (17, 20-26)

I taua anotau ra, ua nana aere i tana mata i te rai, e pure ae ra i te naō raa e : « E tau Metua moa, aore au e pure nei no ratou anae nei, no te feia atoa râ e faaroo mai ia’u, na roto i ta ratou parau. Ia hoe ratou atoa, mai ia oe, e te Metua e, i roto ia’u, ’e o vau hoi i roto ia oe ; ia hoe atoa ratou i roto ia taua, ia faaroo to te ao nei e, na oe au i tono mai. ’E te hanahana ta oe i horoa mai no’u, ua horoa vau ia ratou, ia hoe ratou, mai ia taua e hoe nei. O vau i roto ia ratou, mai ia oe i roto ia’u, ia hoe mau â ratou, ia ite to tea o nei e, na oe au i tono mai ’e ua here oe ia ratou, mai ta oe i here mai ia’u. E te Metua e, te hinaaro nei au i te feia ta oe i hô mai no’u, ia parahi atoa, ’e o vau nei hoi, i te vahi tei reira vau, ia ite mai ratou i tô’u hanahana o ta oe i hô mai no’u i te mea e, e te Metua parautia e, aita to te ao nei i ite ia oe, ua ite râ vau ia oe, ’e ua ite teie nei feia e, na oe au i tono mai. ’E ua faaite au i to oe i’oa ia ratou, ’e e faaite â vau, ia vai â i roto ia ratou te here ta oe i here mai ia’u, ’e ia parahi atoa vau i roto ia ratou. » - Haapopou tatou i te Parau a te Atua.