8e dimanche T.O.

DOMINIKA 8 NO TE TAU NOA

A taio tatou i te puta a Etaretiatiko (27, 5-8)

Mai te i te ueueraa faraoara, e toe mai ā te ota, oia’toa te peapea o te taata i tona ra manaonao. E tamata hia te aua a te potera ra i ta auahi, e te tamatara i te feia parautia ra o te ati ïa. e i te toperaa i te raau e itea hia’i te huru o tana maā e hotu mai, oia’toa te parau no roto mai i te mafatu o te taata. Eiaha e haamaitai i te taata hou tana parauraa mai, te i reira hoi te itearaa te huru o te taata nei. - O te Parau ïa a te Atua.

SALAMO 91 (92.),2-3, 13-14, 15-16

E mea tia te haamaitai i te Fatu,
e te himene i to oe na io’a, e tei Teitei e,
te faaite i to hamani maitai i te poipoi,
e te parau mau na oe i te rui ra.

E ruperupe te taata parautia mai te tamara ra,
e tupu oia mai te arezi i Libano ra.
O tei tanu hia i roto i te fare o te Fatu ra,
e ruperupe ïa i roto i te aumoā o te fare o to tatou Atua.

E hotu ā ïa te paariraa ra,
e vai tona huru api e te hotu rahi
ei faaite e : « E parautia ta te Fatu, oia ta’u haapuraa,
e aore roa e parautia ore i roto iana ra. »

A taio tatou i te epitore matamua a Paulo peata i to Korinetia (15, 54-58)

E au mau taeae e, ia ta’e i te mahana hopea ra, ua riro anae teie nei tino tahuti noa ei tino tahuti ore, ’e teie nei tino pohe noa ei tino pohe ore, ei reira ïa e tupu ai te parau i papaihia ra : Ua horomii-roa-hia te pohe e te rē. E te pohe e, teihea to oe rē ? E te pohe e, teihea to oe tara ? O te hara te tara o te pohe, ’e o te ture te mana o te hara. Ia haamaitaihia te Atua o tei horoa mai i te rē no tatou, na roto i to tatou Fatu o Iesu-Kirito. No reira, e au mau taeae here e, ia vai etaeta noa outou ’e te aueue ora ; ia haere noa outou i mua i te raveraa i te ohipa a te Fatu ; ua ite hoi outou e : e ere ta outou ohipa i te mea faufaa ore i te hioraa a te Fatu. - O te Parau ïa a te Atua.

ALLELUIA (Phil 2, 15d.16a)

’E ia riro outou i roto i taua feia ra mai te tiarama no te ao nei te hopoi na hoi outou i te parau e ora ai ra.

A taio tatou i te Evanelia a Luka peata (6, 39-45)

I taua anotau ra, ua parau atoa oia ia ratou i te hoe ma’a parabole : « E ti’a anei i te hoe matapō ia aratai i te tahi matapō ? Eita anei raua e topa apipiti i roto i te apoo ? Aita te pipi i hau i tāna ra orometua ; area rā, ia hope te hoe pipi i te haapii-maitai-hia, e riro oia mai tāna orometua ra. E aha oe e hio noa ai i te pāpā’a iti i roto i te mata o tō taeae ? E aha hoi oe e ore ai e haapao i te raau rahi i roto i to oe iho mata ? E aha e ti’a ai ia oe ia parau i tō taeae : 'E ta’u taeae nei e, eiaha na e rû, e iriti atu vau i te pāpā’a iti i roto i tō mata'; ’e aore hoi oe i ite i te raau rahi i roto i to oe na mata ? E tenā na taata aau piti e : e matāna oe i te iriti i te raau rahi i roto i to oe mata, ei reira ïa oe e ite maitai ai, ia iriti i te pāpā’a iti i roto i te mata o tō taeae. E ore te raau maitai e hotu mai i te māa ino, eita atoa te raau ino e hotu mai i te māa maitai. E itehia hoi te huru o te raau i te huru o te māa ; eita te suke e pafaihia i nia i te raau taratara, ’e eita atoa te māa vine e ootihia i nia i te tataramoa. E ititi mai te taata maitai i te maitai no roto mai i te pu’e’a taoa maitai o tōna mafatu, e iriti mai te taata ino i te ino no roto mai i te pu’e’a taoa ino o tōna mafatu. Ta te vaha e parau ra, o te mea ïa e mani’i no roto mai i te mafatu. » - Haapopou tatou i te Parau a te Atua.