9e dimanche T.O.

DOMINIKA 9 NO TE TAU NOA

A taio tatou i te puta toru no te mau Arii (8, 41-43)

I te mau mahana ra, i te hiero, ua pure atura Salomona i te Atua i te naō raa e : « Teie atoa hoi, te hoe taata è e ere râ no to oe ra nunaa o Iseraela nei, ia tae mai oia mai te fenua roa mai, no to oe ra ioa (e faaroo hia hoi to oe ra ioa rahi, e to oe ra rima puai, e to oe ra rima, i faatoro hia i te mau vahi atoa), ia haere maira oia e ia pure oia i teienei vahi : e faaroo faatia mai oe i nia i te ai ra, i mau ai to oe ra parahiraa, e e rave oe i te mau mea’toa, ta te taata è i ani maira ia oe na, ia ite e ia mataû te mau nunaa’toa o te ao atoa nei i to oe ra ioa, mai to oe nunaa ra o Iseraela atoa ra te huru, e ia taa papu ia ratou e, ua tiaoro hia to oe ra ioa i nia i teienei fare, ta’u i faatia aera. » - O te Parau ïa a te Atua.

SALAMO 116,1, 2

A haamaitai i te Fatu, e te mau nunaa atoa e !
A faateitei iana, e te mau taata’toa e !

E mea puai tona aroha i nia ia tatou nei,
e tana ra parau-mau e tia i te vairaa e a muri noa’tu.

A taio tatou i te epitore a Paulo peata i to Galatia (1, 1-2.6-10)

O Paulo, e apotoro aore i tonohia e te taata ’e na roto i te hoe taata, i tonohia rā e Iesu-Kirito ’e te Atua Metua, o tei faatiafaahou ia Iesu-Kirito no roto mai i tei pohe ra, ’e te mau taeae atoa ia’u nei, i te mau Etaretia i Galatia na. Te maere nei au ia outou, o outou i haapae vave iana i tei nomino ia outou na roto i te karatia a te Kirito, a haere atu ai i te tahi Evanelia ’ē. Aita e Evanelia ’ē, te vai na rā te taata o te faaarepurepu nei ia outou ’e o tei hinaaro e ruri ’ē atu i te Evanelia a te Kirito. Ia a’o noa atu rā te tahi, tae noa atu ia’u nei, tae noa atu i te hoe melahi no te ra’i, ia a’o noa atu te tahi ia outou i te hoe Evanelia ’ē i te Evanelia i a’ohia e au, ia riro oia ei anatena. Mai tā’u ā hoi i parau a’enei, te parau atu nei i teienei mahana : ia a’o noa atu te tahi taata ia outou i te evanelia ’ē i te Evanelia i faariihia na e outou, ia riro oia ei anatena. A faaroo na i tā’u parau, ’e a feruri, o to te taata mauruuru anei tā’u e titau nei, ’e o to te Atua ? Te titau nei anei au ia mauruuru te taata ia’u ? Ahiri au e titau noa nei ā ia mauruuru te taata ia’u, e ere atura ïa vau i te tavini no te Kirito. - O te Parau ïa a te Atua.

ALLELUIA (Ioa 3, 16)

I here mai hoi te Atua to te ao nei e tae roa atu i te horoa mai i tana Tamaiti fanau tahi, ia ore ia pohe te hoe a'e taata e faaroo iana, ia roaa rã iana te ora mure ore.

X A taio tatou i te Evanelia a Luka peata (7, 1-10)

I taua anotau ra, ’e, oti a’era tāna mau paraparauraa i te taata, ua tomo atura Iesu i roto i Kaperena. Tei reira te tavini here o te tahi keneturio, ua pohe i te ma’i, ’e ua fatata hoi i te pohe. Ua faaroo taua keneturio ra i te roo o Iesu, ’e ua tono atura i te tahi mau taata paari Ati-Iuda e ani atu ia Iesu ia haere mai oia e faaora i tōna tavini. ’E, tae atura ratou ia Iesu ra, ua parau maitai atura iana ma te onoono, na ō atura : « E au teie taata ia faatia oe i tāna aniraa ; e here hoi oia i to tatou nunaa, ’e nana i faatia i ta matou sunago. » Haere maira Iesu ’e ratou atoa, ’e, huru fatata maira te fare, ua tono atura taua keneturio ra i te hoa nona e parau ia Iesu : « E te Fatu, eiaha oe e faaohipa rahi ia oe, eita hoi au e au ia tomo mai oe i roto i ta’u fare ; o te tumu atoa hoi i ore ai au i manao e, e ti’a ia’u ia tae tino atu i mua ia oe ; e parau noa rā oe i te hoe noa a’e parau, ’e e ora ïa ta’u tavini. O vau nei hoi, o raro a’e ïa i te mana no tei hau ia’u, e faehau ra o raro a’e ia’u ; ia parau noa atu vau i  te hoe : “a haere !”, ua haere ïa ; ’e i te tahi : “haere mai !”, ua haere mai ïa ; ’e ia parau hoi au i ta’u tavini : “a na ō !”, ua na reira ïa oia. » I to Iesu faarooraa i taua parau ra, umere atura oia i taua taata ra. Ua fariu atura oia i te tiaa rahi taata e pee mai ra iana ra, ’e ua na ō atura : « Oia mau tā’u e parau atu ia outou na, aita ā vau i ite a’enei i te faaroo mai teie te rahi e tae noa atu hoi i Iseraela nei ! » Ua hoi atura te feia i tonohia maira, ’e, tae a’era i te fare, roohia maira ua ora taua tavini i ma’ihia ra. - Haapopou tatou i te Parau a te Atua.