Ascension du Seigneur

I TE MAHANA MAHA I MURI A’E I TE DOMINIKA 6 NO TE TAU PAKATE

TE MAUERAA O TE FATU

Oro’a hanahana

A taio tatou i te Ohipa a te mau Apotoro (1, 1-11)

Ua papai au i tâ’u puta matamua, e Theophilo e, ei faaiteraa i te mau mea atoa ta Iesu i rave ’e haapii, mai te haamataraa mai â, e tae noa mai i te mahana i afaihia atu ai oia i nia, ia oti te mau apototo tâna i maiti ra i te haapiihia e ana ma te mana o te Varua-Maitai. I muri mai i tôna poheraa, ua faaite oia iana iho ia ratou, ’e te ora ra oia ; ’e e rave rahi te tapao i haapapu i te reira ia ratou : ua fâ mai hoi oia ia ratou i te parau o te Basileia i na mahana e maha ahuru. ’E, te tamâa ta oia ’e o ratou atoa, ua faaue maira oia ra ratou : eiaha ratou e haere ’ê atu i Ierusalema, e tiai râ i tei parau fafauhia mai e te Metua, ’e ua na ô maira oia : « O te parau ïa ta outou i faaroo na no roto mai i ta’u vaha. I papetito na hoi Ioane i te pape, area outou, e papetitohia outou i te Varua-Maitai i teie mau mahana i mua nei. » Ua putuputu ratou, ’e au ui atura ratou iana : « E te Fatu, ei teienei anei ’e e hoi faahou mai au ia outou. oe e haamau faahou ai i te basileia no Iseraela ? » Ua parau maira Iesu ia ratou : « E ore e faaitehia ia outou te tau ’e te taime i faataahia e te Metua i tôna iho mana ; E horoahia mai râ ia outou te mana o te Varua-Maitai, o te pou mai i nia ia outou, ’e e riro outou ei ite no’u i Ierusalema, e ati a’e o Iudea ’e Samaria e tae noa atu i te hopea o te fenua nei. » ’E, te parau noa ra oia i taua parau ra, ua afaihia atura oia i nia, i mua noa i to ratou mata, ’e ua huna maira te hoe ata iana, mo’e atura oia i to ratou mata. ’E, te tiatonu noa ra ratou i te ra’i e hio ia Iesu i te revaraa atu, inaha ti’a maira na taata toopiti ma te ahu teatea. Ua na ô maira raua : « E teie nei mau taata Galilea e, e aha outou e ti’a noa ai ma te tiatonu i te ra’i ? Iesu, o tei rave-’ê-hia a’enei mai rotopu mai ia outou, ’e tei afaihia i nia i te ra’i, e hoi mai â ïa ; ’e mai ta outou i ite iana i te revaraa atu i nia i te ra’i, mai te reira atoa ia hoi mai oia. » - O te Parau ïa a te Atua.

SALAMO 46, 2-3, 6-7, 8-9

E te mau nunaa e, a popo atu i te rima,
a pii hua na i te Atua ma te reo umere !
E au hoi ia mataû hia te Fatu te Teitei-Rahi roa e,
te arii rahi i nia i te fenua’toa nei.

Uaae te Atua ma te umere ;
e te Fatu ma te haruru o te pu ra :
a faatai i te himene, no to tatou Atua, a faatai i te himene,
a faatai i te himene, no to tatou Arii, a faatai i te himene !

E arii oia no te fenua’toa ra ;
a himene outou i te himene aravihi roa no te Atua, ma to outou ite atoa ra !
Tei te Atua hoi te hau i nia i te mau etene,
e te parahi ra oia i nia i tona terono mo’a ra.

A taio tatou i te epitore i te mau Hebera (9, 24-28 ; 10, 19-23)

E ere hoi te vahi mo’a i hamanihia e te rima taata, e ere hoi te hohoa o te vahi mo’a mau tei tomohia e te Kirito, o re ra’i mau râ, ia itehia oia i mua i te aro o te Atua ei ti’a no tatou. Tei reira oia, e ere râ ia pûpû pinepine oia iana iho, mai te tahu’a rahi e tomo i te mau matahiti atoa i roto i te vahi mo’a, ma te toto ’ê i tôna iho ra. Ahiri hoi e mea na reira, e rave rahi a’enei ïa tôna mauiuiraa, mai te faatumuraahia mai â o teie nei ao. Hoe roa râ ôna faaiteraahia, i te tau hopea nei, ia faaorehia     te hara i tâna iho tutia. ’E mai te taata nei i haapaohia, ia hoe a’e ôna poheraa - i muri mai o te haavaraa ïa - oia atoa te Kirito, hoe anae ôna pûpûraahia ei taraehara no na taata e rave rahi. E fâ mai â oia, o te piti ïa o te fâraa mai, e ere râ ei taraehara, ei faaora râ i te feia e tiai iana ra. No reira, e au mau taeae e, te tiaturi papu nei tatou e, e tomo tatou i roto i te vahi mo’a i te mana o te toto o Iesu : na nia i te ea api ’e te ora, tâna i avari na roto i te paruru ra, oia hoi na roto i tôna ra tino. ’E e tahu’a nui to tatou i haamanihia i nia i te utuafare o te Atua. No reira, a faafatata tatou, ma te mafatu ti’a, ’e te faaroo papu ; ua tamâhia hoi to tatou mau mafatu i te mau viivii atoa, ’e ua horoihia to tatou tino i te pape mâ. Ia fâ’i tamau tatou i to tatou tiaturiraa, e parau mau hoi tâna, ta tei parau fafau mai ia tatou. - O te Parau ïa a te Atua.

ALLELUIA

’E inaha, tei ia outou na vau, i te mau mahana atoa e tae noa atu i te hopea o teie nei ao.

A taio tatou i te Evanelia a Luka peata (24, 46-53)

I taua anotau ra, i muri ae i to Iesu tiafaahouraa, ua fā maira oia i taua mau pipi, e ua naō atura : « Teie tei papaihia : ia mauiui te Kirito ’e ia tiafaahou oia, mai roto mai i tei pohe ra, i te toru o te mahana. ’E e poro-haere-hia te tatarahapa ’e te faaoreraa hara i tôna ra i’oa, mai Ierusalema atu nei, e tae noa atu i te mau nunaa atoa. Ei ite outou no taua mau parau ra. Area vau, e tono atu ïa i nia ia outou i tei parau-fafau-hia e ta’u Metua. E parahi râ outou i roto i te oire nei a ia pou noa mai i nia ia outou te mana no nia mai i te ra’i. » ’E ua aratai atura oia ia ratou i te pae o Betania. Ua hopoi a’era oia i tôna rima i nia, ’e ua haamaitai maira ia ratou. ’E, tei te haamaitairaa oia ia ratou, ravehia atura oia i nia i te ra’i. Ua tahopu atura ratou i mua iana, ’e ua hoi maira i Ierusalema, ma te oaoa rahi. ’E e ti’a noa ratou i roto i te hiero i te haamaitairaa i te Atua.        - Haapopou tatou i te Parau a te Atua.