Dimanche de Pentecôte

PENETEKOTE
Oro’a hanahana

PURE TUTIA NO TE AO

A taio tatou i te Ohipa a te mau Apotoro (2, 1-11)

’E, tae a’era i te mahana Penetekote, ua putuputu a’era ratou atoa i te vahi hoe. ’E,  aore i māhia, o te haruru maira, mai nia mai i te ra’i, e au i te mata’i rahi ’u’ana ra ; ī roa a’era te fare i ruruhia e ratou. ’E ua fā maira ia ratou te arero, mai te auahi ra te huru, ’e ua vehe maira taua mau arero ra, ’e ua tau ihora i nia ia ratou tataitahi. Ī roa a’era ratou atoa i te Varua-Maitai, ’e ua haamata ihora i te parau i te reo ’eē, mai te au i tei horoahia mai e te Varua-Maitai. Te noho ra i Ierusalema te Ati-Iuda paieti no te mau fenua atoa i raro a’e i teie nei ra’i. ’E faaroo a’era te taata i taua haruru ra, ua tairuru maira te hoe tiaa rahi taata, ’e ua ’āehuehu roa ratou : te faaroo ra hoi te taata tataitahi i tōna iho reo i te parauraahia mai ra. Te maere ra ratou ’e te faahiahia ra, ’e te parau ra ratou ratou iho : « E ere anei teie nei mau taata e parau nei i te taata Galilea anae ? E aha rā hoi tatou tataitahi e faaroo ai i tōna iho reo tumu i te parauraahia mai ? Tatou atoa nei hoi, to Paretia, to Medai ’e to Elama, te feia e parahi i Mesopotamia, i Iudea, i Kapadokia, i Ponoto ’e i Asia, to Pherugia ’e o Pamephulia, to Aiphiti ’e to te pae o Lubia i piri mai i Kurene, to Roma e ratere nei i teie nei oire, te Ati-Iuda ’e te peroseluto, to Kereta ’e to Arabia, te faaroo nei tatou atoa ia ratou i te faaiteraa i te mau ohipa maere a te Atua. » - O te Parau ïa a te Atua.

SALAMO 103 (104), 1ab.24ac, 29bc-30, 31.34

A haamaitai i te Fatu, e ta’u varua e !
E te Fatu, e ta’u Atua, o oe na tei rahi roa !
Aue te rahi o ta oe mau ohipa, e te Fatu e !
ua î te fenua nei i te oe ra taoa.

Ua rave anae mai oe i to ratou aho, ua pohe ïa ratou,
ua hoi anae atura i to ratou ra repo mau.
Ua haapuai atu anae oe i to aho, ua poiete hia ratou
e ua faaapi oe i te aroa o te fenua nei.

Ia vai te hanahana o te Fatu e a muri noa’tu,
ia oâoâ hoi te Fatu i tana ra mau ohipa !
Ia farii-aroha hia mai ta’u parau e ana,
O vau nei ra, te oâoâ nei au e te Fatu !

A taio tatou i te epitore a Paulo peata i to Roma (8, 8-17)

E au mau taeae e, ’e e ore ta Atua e mauruuru i te feia e pee i ta te tino. Area outou, aita outou i raro a’e i te mana o te tino, tei raro râ i te mana o te Varua, te parahi nei hoi te Varua o te Atua i roto ia outou. Te taata râ aore iana ra te Varua o te Kirito, e ere oia i te taata no te Kirito. Tei roto te Kirito ia outou ra, ua pohe iho â ïato outou tino no te hara, area to outou varua te ora nei ïa. ’E, te parahi na i roto ia outou te Varua o te Atua, o tei faatiafaahou ia Iesu mai roto mai i tei pohe ra, nana ïa, na tei faatiafaahou ia Iesu, mai roto mai i tei pohe ra, e faaora mai i to outou mau tino pohe noa, na roto i tōna Varua, o tei parahi i roto ia outou na. No reira, e au mau taeae na, e aitarahu tatou, eiaha rā i te tino, a haapoa atu ai tatou i ta te tino. Ia haapao hoi outou i ta te tino ra, e pohe ïa outou ; ia haapohe rā outou i ta te tino i te mana o te Varua, e ora ïa outou. No te mea, te feia e arataihia e te Varua o te Atua, e tamarii ïa ratou na te Atua. E ere hoi te Varua i horoahia mai ia outou i te Varua faatîtî, a mata’u faahou ai outou ; e Varua faatamarii râ tei horohia mai ia outou, ’e nona tatou e tiaoro ai e : « Aba, e te Metua e ! » Na taua hoi Varua ra, e faaite mai i to tatou varua e : e tamarii tatou na te Atua. E tamarii na te Atua ra, e feia tufaa atoa ïa tatou, e feia tufaa i te Atua, e feia tufaa ’e te Kirito atoa ra ; te amo nei hoi tatou i te mauiui ’e oia atoa ra,         ia faahanahanahia tatou ’e oia atoa ra. - O te Parau ïa a te Atua.

VENI SANCTE SPIRITUS

A haere mai, e te Varua Mo’a e,
e a tono mai, mai nia mai i te ra‘i na,
i te hoe hihi o ta oe maramarama.

A haere mai, e te Metua o te feia veve,
a haere mai, e te tumu no reira mai te mau ô,
a haere mai, e te maramarama o te mafatu.

E te tamahanahana mana hope,
e te manihini maru hau a’e o te mau varua,
e te puva’iva’i maru e.

O oe te faaearaa i roto i te ohipa,
o oe te tamaru i te fiva,
o oe te tamahanahana i te oto.

E te maramarama mo’a e,
haere mai, a faaî i te mafatu
o to oe feia faaroo.

Aita to mana Atua ra,
aita atoa ïa e taata
i ore i viivii roa.

A tama mai i tei viivii,
a tavai i tei papamaro,
a faaora i tei paparu.

A haamaru i tei etaeta,
a tamahanahana i tei toetoe,
a faatitiaifaro i tei pipii.

Ho mai i na ô mo’a e hitu
i te feia atoa a faaroo
e e tiaturi ia oe.

Ho mai i te merite e te viretu.
Ho mai i te ora hopea roa.
Ho mai i te oaoa mure oe.

Amene.

ALLELUIA

Haere mai e te Varua-Maitai e ! A faaï i te mafatu o ta oe mau pipi ! E a tahu-hua mai i roto ia ratou i te auahi o to aroha !

A taio tatou i te Evanelia a Ioane peata (14, 15-16.23b-26)

I taua anotau ra, ua parau atura oia Iesu i taua mau pipi : « I here mai outou ia’u ra, e tapea ïa outou i tâ’u faaueraa, ’e na’u e pure i te Metua, ’e nana e horoa mai i te tahi atu Faaa’o ia outou, ia parahi oia ’e outou atoa e a muri noa atu. Ia here mai te hoe taata ia’u, e haapao oia i tâ’u parau, e herehia oia e ta’u Metua, ’e e haere atu maua iana ra, a noho roa atu ai iona ra. O te ore e here mai ia’u, e ore oia e haapao i tâ’u parau. E ere râ tâ’u parau i tâ’u iho, na te Metua râ, na tei tono mai ia’u. I faaite atu vau ia outou i taua mau parau ra, a parahi noa ai au i pihai iho ia outou. Na te Faaa’o râ, na te Varua-Maitai, o te tonohia mai e ta’u Metua ma tô’u nei i’oa, nana e haapii mai ia outou i te mau mea atoa, ’e nana e haamanao mai ia outou i te mau parau atoa tâ’u i faaite atu ia outou. » - Haapopou tatou i te Parau a te Atua.