La Sainte Famille

DOMINIKA i te 7 o te mahana i muri ia Noere

I te dominika i te area i ropu ia Noere e te matahiti api. Aita e dominika i roto i taua area ra, ei te 30 ïa no Titema.

TE UTUAFARE MO'A O IESU, MARIA E IOSEPHA

Oro'a

A taio tatou i te puta hoe no te mau Arii (1, 19c-22.24-28)

Ite ihora o Elekana i tana vahine ra o Ana, e ua haamanao te Fatu iana ra. I tau mahana rii i muri mai, tô ihora o Anna, e ua fanau i te tamaiti, e ua topa i tona ioa ra o Samuela, no te mea nana iho i ani atu iana i te Fatu ra. Haere atura tana tane ra o Elekana i nia, e tona utuafare atoa, ia pupu oia i te Fatu ra i te tutia i haamâtau hia, e i tona ra euhe. Aita râ o Anna i haere, ua naô atura hoi oia i tana ra tane : Eita vau e haere, e tae noa’tu i te haamairiraa te û i te tamaiti, e aratai atu vau iana ia tae oia i mua i te aro o te Fatu, e ia parahi tamau oia i reira ra. E i te mairiraa te û, ua aratai atura oia iana, e i na kafa oni e toru atoa, e na farii faraoa e toru e te mohina uaina, e ua aratai atura iana i roto i te fare o te Fatu ra i Silo. Te vai aruaru noa ra te tamaiti. E ua tupai ratou i te kafa ei tutia, e ua pupu ihora i te tamaiti ia Heli ra. E ua naô aera o Anna : A faaroo mai, e ta’u fatu e, ia ora to varua, e ta’u fatu e : o vau ïa tera vahine i tia i pihaiiho ia oe iônei ma te pureraa’tu i te Fatu ra. No teienei tamaiti hoi au i pure ai, e ua faatia mai te Fatu i ta’u aniraa ta’u i ani iana ra. No reira vau i pupu atu ai iana i te Fatu ra, e ua pupu hia oia i te Fatu no te mau mahana’toa ra. E ua haamori ratou i reira i te Fatu ra. - O te Parau ïa a te Atua.

SALAMO 83 (84.), 2-3, 5-6, 9-10

O te popou rahi o to oe na mau tiahapa,
e te Fatu o te mau nuu e !
Te nounou e te hiaai rahi nei ta’u varua i te mau vahi moâ o te Fatu
te oâoâ nei ta’u mafatu e ta’u tino i te Atua ora ra.

E ao to te parahi i to fare ra,
te arue nei ratou ia oe ma te tuutuu ore.
E ao to te mau taata, o oe to ratou puai,
te opua ra to ratou mafatu e, e paiuma i nia.

E te Fatu o te mau nuu e, a faaroo mai i ta’u nei pure,
e faaroo mai ia’u, e te Atua o Iakoba e ;
A hio mai, e te Atua e, to matou paruru e,
e a haapao mai i tei Faatahinu hia e oe ra !

A taio tatou i te epitore matamua a Ioane peata (3, 1-2.21-24)

E au mau here e, a hio na i te rahi o to te Metua here ia tatou nei, i parauhia ai tatou e, e tamarii na te Atua ; ’e oia mau, e tamarii iho ā tatou nana ra. Teie te tumu i ore ai to te ao nei i ite ia tatou : aita to te ao nei i ite i te Atua. E au mau here e, e tamarii tatou na te Atua i teie nei, aita ā rā to tatou huru a muri atu i faaitehia mai. Ua ite rā tatou e, ia fā mai oia ra, e riro tatou mai iana ra te huru, no te mea e ite ia tatou i tōna huru mau. E au mau here e, ia ore to tatou mafatu e faahapa mai ia tatou, e tiaturi rahi ïa to tatou i mua i te Atua. E te mau mea atoa ta tatou e ani iana ra, e noaa mai ïa, no te mea te haapao nei tatou i tāna mau faaueraa, ’e te rave nei i te mau mea atoa e mauruuru ai oia ra. ’E teie hoi tāna faaueraa : e faaroo i te i’oa o tāna Tamarii o Iesu-Kirito ’e e here tatou tatou iho, mai tāna i faaue mai ra. O te haapao i tāna mau faaueraa ra, e parahi ïa i roto i te Atua, ’e e parahi mai te Atua i roto iana. ’E teie te mea e ite ai tatou e, te parahi nei oia i roto ia tatou : o te Varua-Maitai ïa tāna i horoa mai ia tatou nei. - O te Parau ïa a te Atua.

ALLELUIA (cf. Ohip 16, 14b)

Ua haamahorahora te Atua i tōna mafatu, ia haapao maite oia i te mau parau i faaitehia o ta oe Tamaiti.

A taio tatou i te Evanelia a Luka peata (2, 41-52)

I te mau matahiti atoa e haere na metua o Iesu i Ierusalema no te oroa Pāsa. ’E tae a’era i te ahuru ma piti o tōna matahiti, ua haere atura ratou i taua oroa ra, mai tei mātauhia. E hope a’era te pu’e mahana o te oroa, ua hōno’i Iosepha raua Maria. Ua faaea rā te tamaiti o Iesu i Ierusalema, ’e aita na metua i ite. Te manao ra raua e, tei roto i te pupupererina ; i haere noa ai raua e hoe a’era mahana i te haereraa. O to raua ïa imiraa iana i rotopu i te mau fetii ’e te feia i mātarohia e raua. ’E, aore a’era oia i itea, hōho’i atura raua i Ierusalema i te paimiraa iana. E hope a’era na mahana e toru, ite atura raua iana i roto i te hiero ; ua parahi oia i ropu i te mau orometua, te faaroo atu ra oia ia ratou ’e te uiui atu ra. Umere anae ihora te feia atoa i faaroo iana ra i tōna maramarama ’e i tāna mau pahonoraa. I to raua iteraa iana, hitima’ue a’era raua ; ua parau atura tana metua vahine iana : “E ta’u tamaiti, e aha oe i na reira mai ai ia maua ? Inaha hoi, i imi noa na maua o tō metua tane ia oe ma te ahoaho.” Ua pahono maira oia : “E aha orua i imi mai ai ia’u ? Aita anei orua i ite e, ei roto vau i te fare o ta’u Metua e ti’a ai.” Aita rā raua i taa i te auraa o te parau tāna i ta’o mai nei ia raua. Hoi maira Iesu na muri ia raua i Nazareta. Ua auraro oia ia raua. Tapea maite ihora tana metua vahine i taua mau parau atoa ra i roto i tōna mafatu. Tupu atura Iesu : tōna tino ’e tōna paari ’e te here hoi - Haapopou tatou i te Parau a te Atua.