Saint-Sacrement

I TE DOMINIKA I MURI I TE ORO’A O TE TORUTAHI MO’A E FAAHANAHANAHIA AI

TE TINO MO’A E TE TOTO

O TE KIRITO

Oro’a hanahana

A taio tatou i te puta Genese (14, 18-20)

I taua mau mahana ra, area ra o Melehisedeka, te arii o Salema, hopoi atura i te pane e te vine ei tutia, e tahua hoi oia no te Atua Teitei ra. Haamaitai atura oia ia Aberama, naô aera : « Ia haamaitai hia o Aberama e te Atua Teitei, o tei poiete i te rai e te fenua. Ia haamaitai atoa hia’tura te Atua Teitei, no tona tauturu i riro ai to enemi i to rima na. » Ua tuu maira Aberama i te ahuru o tana mau taoa’toa iana ra. - O te Parau ïa a te Atua.

SALAMO 109,1, 2, 3, 4

E parau tohu na te Fatu i ta’u Fatu ra :
« E parahi oe i ta’u rima atau nei,
e ia faariro hia e au to mau enemi
ei taahiraa avae no oe. »

E faatae atu te Fatu
i te sepeta o to oe na mana mai Siona atu nei,
ei arii oe i rotopu i to oe ra mau enemi.

Ei ia oe te mana i tre mahana o to oe na fanauraa
i nia i te mau moua moâ ra,
Mai te opu mai, mai te hitia poipoi o to oe na apiraa.

Ua tapu te Fatu,
e ore Oia e tatarahapa,
« E tahua oe e a muri noa’tu,
ia au i te autahuaraa a Melekisedeka ra ! »

A taio tatou i te epitore matamua a Paulo peata i to Korinetia (11, 23-26)

E au mau taeae e, ua tuuhia mai hoi ia’u, no ô mai i te Fatu ra, te parau tâ’u i tuu atu ia outou : i te ru’i i haavarehia ai oia, ua rave ihora te Fatu ra o Iesu i te pâne, ua haamaitai atura oia i te Atua, ’e ua vavahi ihora i taua pâne ra, na ô atura : « O ta’u tino teie, o te horohia nei no outou. E na reira outou ei haamanaoraa ia’u. » Ua na reira atoa oia i te au’a, i muri a’e i te amuraa mâa, na ô atura : « Teie nei au’a, o te Faufaa api ïa i tô’u nei roto. E na reira outou i te mau taime atoa e inu ai outou i te reira ei haamanaoraa ia’u. » I te mau taime atoa hoi e amu ai outou i teie pane ’e e inu ai i teie nei au’a, e faaite outou i te poheraa o te Fatu e tae noa mai ai oia ra. - O te Parau ïa a te Atua.

« Lauda Sion » (ad libitum)

ALLELUIA (Ioa 6, 51)

Ua parau atura oia ia raua te Fatu : O vau te pāne ora e pou mai te ra’i mai. O te amu i taua pāne ra, e ora ïa e a muri noa atu.

A taio tatou i te Evanelia a Luka peata (9, 11b-17)

I taua anotau ra, ’e ua Iesu paraparau atura ia ratou no te Basileia o te Atua, ’e ua faaora atura i tei ma’ihia ra. ’E tapetape roa atura te mahana, ua faafatata maira te tino ahuru ma piti ia Iesu, na ô maira : « E faahoi oe i teie tiaa rahi, ia haere ratou i roto i te mau oire rii ’e te mau vila taoto ai, ei reira atoa ta ratou mâa e noaa ai ; e vahi mo’emo’e hoi teie. » Ua parau atura râ oia ia ratou : « Na outou ta ratou mâa e horoa atu. » Ua parau maira ratou : « E pae anae a matou faraoa ’e e piti i’a. ’e aore râ, e haere matou e hoo mai i te mâa na teie nahoa rahi ? » E mahere e pae tauatini taua feia ra. Ua parau atura Iesu i tana mau pipi : « A haaparahi pupu ia ratou i raro, ia taipae ahuru taata i te pupu hoe. » Ua na reira atura te mau apotoro, haaparahi atura te taata i raro. Rave ihora Iesu i na faraoa e pae ’e na i’a e piti, nânâ a’era tana mata i nia i te ra’i, haamaitai atura i te Atua, vavahi ihora i te faraoa, ’e tuu atura i tana mau pipi ra, ia opere atu na te nahoa rahi. Amu anae ihora, ’e paia a’era, ’e ua afaihia atura te mau toea mâa i roto i na été hoe ahuru ma piti. - Haapopou tatou i te Parau a te Atua.