Sainte-Trinité

I TE DOMINIKA I MURI MAI I TE PENETEKOTE

TE TORUTAHI MO’A

Oro’a hanahana

A taio tatou i te puta Maseli (8, 22-31)

A faaroo mai i ta te Paari e parau nei : « Te i te Fatu ra vau, mai te haamataraa mai o tona ra mau haerea, hou oia i poiete ai i te hoe mea, i te matamua ra. Ua faatia hia vau mai etereno mai â, mai tahito mai â, hou te fenua i hamani hia’i. Aore hoi e moana, i tô hia na vau, aore hoi te mau tumu pape, i pihaa maira ; Aita i tatumu hia te pueraa teiaha o te mau moua, aita hoi te mau aivi i faafanau hia’i au. Aita hoi oia i hamani i te fenua e te mau anavai, e te mau poro o te fenua’toa nei. Iana i faanehenehe i te mau rai ra, te i reira vau, iana i haaati i te mau moana i tona ra otia i te hoe ture aueua ore ; iana i haamau i te reva i nia ra, iana hoi i faaau maitai i te mau tumu pape ; iana i haaati i te miti i tona ra otia, e i tuu i te hoe ture i te mau pape, ia ore ia oua na nia iho i to ratou ra mau otia, iana i haamau i te mau tumu o te fenua nei ; te i pihai iho hoi au iana i te faaauraa i te mau mea’toa, te oâoâ noa ra vau, i te mau mahana’toa ra, i te oâoâ tamau maiteraa i mua i tona ra aro ; i te oâoâ maiteraa i te ao atoa ra, e te i ropu i te mau tamarii a te taata ra to’u popouraa. » - O te Parau ïa a te Atua.

SALAMO 8, 4-5, 6-7, 8-9

Ia hio â vau i to rai, te ohipa a to rima,
te marama e te mau fetia ta oe i haamau ra.
E aha te taata, i manao mai ai oe iana,
e te tamarii a Adamu, i haapao ai oe iana ?

Ua faaiti iti ae oe iana i te hoe atua iho ra,
ua faakorona oe iana i te hanahana e te anaana.
E ua faatavana oe iana i nia iho i te mau ohipa a to rima na;
ua tuu oe i te mau mea’toa i raro ae i tona avae.

Te mau mamoe ü e te mau puaatoro atoa ra,
oia’toa te mau puaa o te aru,
te mau manu o te reva e te iâ o te tai,
tei na te éà o te moana ra te haere.

A taio tatou i te epitore a Paulo peata i to Roma (5, 1-5)

E au mau taeae e, no te mea ua faarirohia tatou ei feia parautia i te mana o te faaroo, ua hau atoa ïa tatou ’e te Atua na roto i to tatou Fatu ra ia Iesu-Kirito. Na roto atoa hoi iana e tae atu ai tatou i te karatia o te horoahia i te feia faaroo. Te parahi nei hoi tatou i roto i te karatia, ’e ua riro to tatou tiairaa i te hanahana o te Atua ei teoteoraa na tatou. E ere râ o te reira anae ra, ua riro atoa te mau ati nei ei teoteoraa na tatou. Ua ite hoi tatou e, e faatupu te ati i te faaoroma’i. ’E na te faaoroma’i e faatupu i te haapao tamau, ’e na te haapao tamau e faatupu i te tiaturi. E ore hoi te tiaturi e haavare, no te mea ua niniihia mai te here o te Atua i roto i to tatou nei mau mafatu e te Varua-Maitai, o tei horoahia mai ia tatou nei. - O te Parau ïa a te Atua.

ALLELUIA (cf. Ap 1, 8)

Ia haamaitaihia te Metua, e te Tamaiti, e te Varua Maitai, te Atua e vai nei, tei vai na e, o te haere mai nei !

A taio tatou i te Evanelia a Ioane peata (16, 12-15)

I taua anotau ra, ua parau atura oia Iesu i taua mau pipi : « E rave rahi atu â tâ’u parau ia faaite atu ia outou, eita râ e maraa ia outou i teienei. Ia tae mai râ oia, te Varua parau mau ra, nana ïa e aratai ia outou e hope roa a’e te parau mau i te faaitehia ia outou. E ore hoi oia e parau i tâna iho parau, e faaite mai râ oia ia outou i te mau parau atoa i faaroohia e ana, ’e e faaite atoa mai oia i te mau mea e tupu a muri atu. E faahanahana mai oia ia’u, no te mea e rave oia no roto i tâ’u, a faaite atu ai ia outou. Te mau mea atoa a ta’u Metua ra, na’u ïa ; i parau ai au ia outou e, e rave te Varua-Maitai no roto i tâ’u, a faaite atu ai ia outou. » - Haapopou tatou i te Parau a te Atua.