Veille de la Pentecôte

PENETEKOTE
Oro’a hanahana

PURE TUTIA NO TE AHIAHI MAHANA MA’A

E tia ai maiti hoe taioraa i roto i na taioraa e maha i raro nei :

1 - A taio tatou i te puta Genese (11, 1-9)

Hoe roa ra reo o to te ao atoa nei, e hoe hoi parau. I to ratou haereraa mai, mai te hitia o te râ mai, ite atura ratou o te hoe vahi papu i te fenua ra i Senaara, parahi ihora ratou i reira ra. Ua parau ihora ratou ratou iho : A haere mai, a oi tatou i te araea ma te tahu i te reira i te auahi. Roaa maira ia ratou te ofai araea ei ofai papa ra, e te tapau uaua ei pua ra. Parau ihora ratou : A haere mai, a hamani tatou i te hoe oire e te hoe pare, e ia teitei roa te nini e tae roa’tu i te rai, ia riro to tatou ioa ei ioa tuiroo, hou to tatou purara è raa i te mau fenua’toa ra. Pou maira te Fatu i raro e hio i te oire e te pare ta te mau tamarii a Adamu i patu ra. E ua naô maira : Inaha, hoe noa iho nunaa teie feia, e hoe roa ra reo to ratou atoa ra ; ua haamata ratou i teie ohipa, eita hoi e ore to ratou opuaraa e oti roa’tu te ohipa. Mai haere tatou i raro e faahuru è i to ratou ia ore te hoe ia faaroo i to tona iho taata tupu reo. I reira ra to te Fatu haapurararaa’tura ia ratou i te mau fenua’toa e ati noa’e, e faaea ihora ratou i te patu i taua oire ra. E no reira ua mairi hia tona ioa o Babela, no te mea i reira ra to te Fatu faahuru è raa i te reo o te mau fenua’toa, e tona haapurararaa’tu ia ratou i te aroa o te mau fenua’toa. - O te Parau ïa a te Atua.

E aore râ :

2 - A taio tatou i te puta Exodo (19, 3-8a.16-20b)

I taua mau mahana ra, haere aera Mose i nia, i te Atua ra, e ua pii maira te Fatu iana no nia mai i te moua ra, e ua naô maira : « E parau atu oe i te utuafare o Iakoba, e e faaite atu oe i te mau tamarii a Iseraela : “Ua ite outou iho i ta’u i rave i to Aiphiti, e mai te aha te huru to outou maraaraa ia’u na nia i te pererau aeto ra, e ua rave au ia outou no’u iho. No reira, i faaroo outou i ta’u reo, e i haapao maite i ta’u ra faufaa, e riro, ïa outou ei feia maiti hia no’u ra i te mau nunaa’toa ; na’u hoi te fenua e ati noa’e. O outou râ ei basileia tahua anae no’u, ei nunaa moâ ; “O ta oe ïa parau e parau atu i te mau tamarii a Iseraela ra. » Ua haere maira Mose, putuputu maira te feia matahiapo, faaite atura oia ia ratou i ta te Fatu mau parau i parau maira. Ua naô tahi noa maira te taata’toa : « O ta te Fatu i parau mai, o ta matou ïa e rave. » E tae aera i te toru o te mahana i te poipoi, ia ao roa aera, inaha, o te patiri ihora i te faarooraa hia, e te uiraa i te itearaa hia, e te hoe ata meumeu i te tapoiraa i te moua ra, e te oto hoi o te pu i te painaraa, e mea puai roa ïa ; ua mataû roa te taata i roto i te tiahapa. Ua aratai atura Mose i te taata i rapaeau mai i te tiahapa e farerei i te Atua ra, e parahi ihora ratou i te tumu o te moua ra. E au auahi anae atura taua moua ra o Sinai, no te mea i pou mai te Fatu i nia ihora na roto i te auahi, e pee atura te au auahi i nia mai te auahi umu rahi ra, e mea riaria rahi ihora taua moua ra. E rahi maite aera te oto o te pu, e te haere atura i te vahi atea ; ua parau atura Mose e ua pahono maira te Atua iana. Ua pou maira i te Fatu i nia i te moua ra o Sinai i nia roa iho i te tupuai moua ra, e ua pii maira ia Mose e haere i nia iho i te vahi teitei roa. - O te Parau ïa a te Atua.

E aore râ :

3 - A taio tatou i te puta a Ezekiela peropheta (37, 1-14)

I taua mau mahana ra, te i nia ia’u te rima o te Fatu, e ua aratai mai ia’u te varua a te Fatu, e ua tuu mai ia’u i te hoe vahi papu tei î i te ivi marô ; e ua aratai mai ia’u na ropu e ati noa’e ; e rahi roa ratou i nia i te aroa o taua vahi papu ra, e ua marô roa ino. E ua naô maira ia’u e : « E te tamaiti a te taata, e manao anei oe, e ora teienei mau ivi ? » Pahono atura vau : « E te Fatu, te Atua, o oe tei ite. » Naô maira oia ia’u : « A tohu na oe i nia i teienei mau ivi, e e parau atu oe ia ratou : Outou, e te mau ivi marô, a faaroo mai na i te parau a te Fatu. Teie ta te Fatu, te Atua, e parau nei i teienei mau ivi : inaha, e tuu au i te varua i roto ia outou na, e e ora outou. E e tuu au i te uaua i nia ia outou ; e e faatupu au i te iô i nia ia outou ; e e tapoi au ia outou i te iri, e e tuu au i te varua ia outou, e e ora outou ; e e ite outou e, o vau te Fatu. » Ua tohu aera vau, mai tana i faaue maira ; e i to’u tohuraa, inaha, te haruru maira, e te aueueraa ; e ua puoi maira te mau ivi te tahi i te tahi, i tona iho tuatiraa. Hio atura vau, e inaha, ua tupu te uaua e te iô i nia ia ratou ra, e ua tapoi maira te iri i nia iho i te reira ; aore râ to ratou e varua. E ua parau maira oia ia’u : « A tohu na oe i te varua, a tohu na oe, e te tamaiti a te taata ; e e naô atu oe i te varua : Teie ta te Fatu, te Atua, e parau nei : A haere mai, e te varua, mai na matai mai e maha ra, e a haapuai oe i nia i teie feia i taparahi hia ia ora faahou ratou. E ua tohu au, mai tana i faaue mai ia’u nei, e ua haere mai te varua i roto ia ratou ra, e ua ora ihora ratou,e ua tia maira i nia i to ratou avae, e nuu iti rahi roa ino. E ua naô maira te Fatu ia’u nei : « E te tamaiti a te taata, teienei mau ivi atoa ra, o te utuafare ïa o Iseraela ; ua parau maira ratou e : “Ua marô to tatou mau ivi, e ua mou to tatou tiaturi, ua tapu è hia hoi tatou.” No reira, a tohu na oe, e a naô atu oe ia ratou e : teie te parau a te Fatu, te Atua : inaha, na’u e huai i to outou mau tanuraa, e e aratai mai au ia outou no roto mai i to outou mau menema, o outou, e ta’u nunaa e, e e faahoi au ia outou i te fenua o Iseraela. E e ite outou e, o vau te Fatu, ia huai hia e au to outou mau menema ma te aratai mai ia outou no roto mai i to outou mau apoo ra, e ta’u nunaa e. E ia tuu hia e au ta’u varua i roto ia outou na, e ia ora outou ; e haaparahi ihora vau ia outou i to outou fenua, e e ite outou e, na’u, na te Fatu i parau, e na’u i rave,   te na reira maira te Fatu. - O te Parau ïa a te Atua.

E aore râ :

4 - A taio tatou i te puta a Ioela peropheta (2, 28b-32a)

O te Parau ïa a te Fatu : e ninii au i ta’u varua i nia i te taata’toa ; e e tohu ta outou mau tamaroa, e ta outou tamahine, e taotooto hia to outou mau taata paari i te moemoea ; e e ite to outou mau taata api i te orama. Teie atoa, i te reira mau mahana e ninii au i ta’u varua i nia i ta’u mau tavini tane e te tavini vahine. E e tuu au i te mea maere i nia i te rai, e i nia i te fenua, i te toto, e te auahi, e te pou auauahi ra. E riro te mahana ei mea pouri, e te marama ei toto, hou te taeraa mai no te mahana rahi e te riaria a te Fatu. E i reira, o tei tiaoro i te ioa o te Fatu, e faaora hia ïa. - O te Parau ïa a te Atua.

SALAMO 103, 1-2a, 1a.24, 27-28, 29bc-30

A haamaitai i te Fatu, e ta’u varua e !
E te Fatu, e ta’u Atua, o oe na tei rahi roa !
Ua vehi hia oe i te unauna e te anaana.
Ua faaahu hia oe i te maramarama mai te ahu ra !

Aue te rahi o ta oe mau ohipa, e te Fatu e !
I to oe na Paari anae i oti ai,
ua î te fenua nei i te oe ra taoa.
A haamaitai i te Fatu, e ta’u varua e !

Te tiaturi anae ra te reira ia oe
ia roaa ta ratou maâ i te tau mau ra ;
O ta oe e horoa ra, o ta ratou ïa e rave ;
ia heheu anae oe i to rima ra, ua î ïa ratou i te maitai.

Ua rave anae mai oe i to ratou aho, ua pohe ïa ratou,
ua hoi anae atura i to ratou ra repo mau.
Ua haapuai atu anae oe i to aho, ua poiete hia ratou
e ua faaapi oe i te aroa o te fenua nei.

A taio tatou i te epitore a Paulo peata i to Roma (8, 22-27)

E au mau taeae e, ua ite hoi tatou : te uuru nei te mau mea atoa i poietehia ra i te mauiui fanau e tae roa a’enei i teie nei mahana. E ere rā o taua mea anae ra, o tatou atoa hoi i noaa ia tatou te mau oho matamua o te Varua, o tatou atoa tei uuru i roto ia tatou iho i te tātarira’a i te faatāvairaa, oia hoi te faaoraraahia o to tatou tino. Ua faaorahia hoi tatou, e vai noa rā to tatou ora ei mea tiaihia. Ia ite-mata-hia te mea e tiaihia ra, e ere atura ïa i te tiairaa. E aha hoi e ti’a ai ia tiai-faahou-hia te mea i ite-mata-hia ra. Ia tiaturi rā tatou i te mea itea-ore-hia e to tatou mata, e tiai ïa tatou i te reira ma te aho roa. ’E te turu atoa nei te Varua i to tatou paruparu, aita hoi tatou i ite i te pure ma te au maitai. Na te Varua rā e ani no tatou, na roto i te uuru-raa e ore e ti’a ia parau. Area oia o te paheru i te mafatu, ua ite ïa i te hinaaro o te Varua : e au hoi tāna pure no te feia mo’a i te hinaaro o te Atua. - O te Parau ïa a te Atua.

ALLELUIA

Haere mai na, e te Varua-Maitai e ! A faaî i te mafatu o ta oe mau pipi ! E a tahu hua mai i roto ia ratou i te auahi o tô aroha !

A taio tatou i te Evanelia a Ioane peata (7, 37-39)

’E, tae a’era i te mahana hopea o taua oroa ra, o te mahana ïa i hau a’e i te hanahana, ua ti’a a’era Iesu, ’e ua poro atura : « Ia poiha noa atu te tahi taata, ia haere mai ïa ia’u nei, ’e o tei faaroo mai ia’u, ia inu oia. Mai tei papaihia ra : no roto mai iana, e anavai pape ora te tahe mai. » No te Varua e horoahia mai i te feia e faaroo iana ra taua parau tāna i parau maira. Aita ā hoi te Varua i horoahia maira, no te mea aita ā Iesu i faahanahanahia. - Haapopou tatou i te Parau a te Atua.